2400/2026-2027

Lunglei, 2026 Mimkut Thla ni 28: Vawiin khan Lunglei Municipal Council (LMC) hnuaia Traffic and Transport Co-Ordination Committee (TTCC) chu an Chairman, LMC Vice Chairman Pu K. Lalrinawma hovin Lunglei Convention Centre-a BoC Meeting Hall-ah an ṭhu khawm a. Lunglei khawpui chhunga lirthei tlan dan leh hun dan kaihhnawiha hma lakna tur leh lehkha lut hrang hrangte ngaihtuahin, an sawi ho.

Chairman Pu K. Lalrinawma chuan TTCC chu LMC huam chhung thil khawih danglam leh siam ṭha thei committee pawimawh tak a nih thu sawiin, member-te chu zalen leh uluk taka rorel turin a chah a. Lunglei khawpui chhunga lirthei tlan dan leh hun dan him leh felfai a awm theih nan LMC chuan theih tawpin hma a la reng tih sawiin, LMC-in Enforcement Staff a neih bakah, lirthei hun man (parking fee) tling khawm aṭangin traffic warden pathum rawih an nih thu a sawi.

He ṭhut khawmah hian Member Secretary, LMC Chief Executive Officer (CEO) Pu Lalhmansanga; Police, Public Works Department, Transport leh Information & Public Relations official-te; Mizoram Journalists' Association (MJA), Lunglei District leh Young Mizo Association (YMA), Sub-Headquarters Lunglei ai awhte an tel a. Sawrkar office, kohhran leh pawl hrang hrang aṭanga lirthei dahna hmun (parking) leh dinna hmun (stand) dilna leh stand luah man chungchanga lehkha lutte thlir ho niin, a ṭul anga bawhzui dan tur sawi ho leh ruahman a ni a. LMC BoC ṭhu khawmin kum 2026 Krismas vuakveta him leh nuam zawka mipui an veivah theihna tura lirthei tlan phal lohna hmun, "No Vehicle Zone" siam tura a rel leh TTCC-in ruahmanna siam tura a ruat anga hma lak dan tur ruahmanna tlangpui te sawi ho a ni bawk.