2399/2026-2027

Dated Aizawl, the 28th September 2026: Vawiin khan A.H & Vety Department, Mizoram State Veterinary Council (MSVC) leh Indian Veterinary Association (IVA), Mizoram te tangkawp huaihawtin 'World Rabies Day, 2026' lawmna hun, BSI Hall, Khatla, Aizawl-ah hman a ni a. AH & Veterinary Department Minister Pu C. Lalsawivunga’n Khuallian niin hun a hmanpui a, AH&Vety Department Secretary Pu Lalsangliana chu Khualzahawm a ni.

Minister Pu C. Lalsawivunga chuan India ram hi Ui a hri (Rabies)-in a chenchilh ram a nih thu sawiin, khawvel pum huapin Ui a hri (rabies) avanga thihna zaa 36 laite chu, India rama thleng a nih thu a sawi a. He natna tihbaiawm tak mai hi virus chikhat, ‘Lyssa virus’- in a thlen niin khawvel ram hrang hrang 150 chuangah kum tinin mi 59,000 laiin an thihpui thin thu leh, heng zinga zaa 95 hi Asia leh Africa ram atang report a nih thu a sawi a. WHO chuan he natna umbo turin nasa taka tan a lak mek thu sawiin, kum 2030-ah chuan khawvel ram hrang hrangah um bo tum a nih thu a sawi a. Hemi atan hian thawh hona tha neih a pawimawh thu sawiin, ‘Ui a hri nuai bo tur hian mi tinte hian mawhphurhna kan nei a ni’ a ti a; mipuite hnenah Ui leh ran dangte khuahkhirh a, enkawl dan dikte inzirtirna uar lehzuala neih a tul thu a sawi a ni.

Khualzahawm Pu Lalsangliana pawhin thu sawiin, Mizoram chu India ram state hrang hrangte zingah Stray dog (Tual ui/neitu nei lo ui) nei lo awmchhun nia a hriat thu sawiin, mipui leh sawrkar department hrang hrangte inkarah thawh hona tha a awm chuan, Rabies natna um bo theihna chance nei sang ber ram kan nih thu a sawi bawk.

Vawiin hun hmannaah hian AH&Vety Department Director Dr. Lalrotluanga Sailo chuan kalkhawmte lawmna thu a sawi a, CVSc&AH Associate Professor Dr. Lallawmzuali Ralte-in ‘Stronger Together’ tih thupuia hmangin thawh hona tha neih a pawimawh thu leh, Rabies natna chungchanga hriattur pawimawh hrang hrangte a sawi bawk a; World Rabies Day puala buatsaih Essay Writing Competition result puan ni bawkin Khuallian Pu C. Lalsawivunga’n lawmman a sem nghal bawk a; Indian Veterinary Association, Mizoram Branch President Dr. V. Lalzarzova'n lawmthu sawiin hun hi a khar a ni.

World Rabies Day pual hian AH & Vety Department, Mizoram State Veterinary Council leh Indian Veterinary Association, Mizoram tangkawp chuan Inrinni (26.9.2026) khan Aizawl khawpui huam chhung veng 4 - Zemabawk North, Salem Veng, Ramrikawn leh Phunchawng-ahte, a thlawna Ui a hri danna pek beihpui 'Free Anti-Rabies Vaccination Camp' an lo buatsaih tawh bawk a; Anti-Rabies Vaccine dose 407 pek niin, Ui 358 leh Zawhte 49 te hri danna an pe a ni.

State Level Essay Writing Competition-a lawmman dawngtute:

A. JUNIOR CATEGORY:
Pakhatna - Lalmawipuia, Kids Care School
Pahnihna – Elizabeth C.Lalruafeli, St.Paul’s Higher SecondarySchool
Pathumna – F.Vanlalmuanpuii, Govt. Hnahthial High School

B. SENIOR CATEGORY:
Pakhatna – Dr Lalmuansangi, Chawnpui, Aizawl
Pahnihna – Dr Blessa Sailo, ICAR, Kolasib
Pathumna – Dr Freddy H. Siamthara, Kanan Veng, Aizawl.