3502/2024-2025

2024 Pawltlak thla ni 12: Vawiin khan Lunglei Municipal Council (LMC) hotute chuan Convention Centre, Lungleiah an hma lak dan leh hmachhawp ṭhenkhatte Lungleia thu thar la khawmtute hmaah an sawi.

LMC Chairman Pu Lalzuithanga chuan LMC chuan kum 2 hmel a lo hmu ve ta tih sawiin, sawrkarin a enkawlnaah lawm thu a sawi a. LMC chu mahnia inenkawl thei tura ngaih a nih angin chumi tur chuan an inpuahchah reng tih a sawi a. Motor parking fee lak, advertisement leh hoarding tar phalna, building regulation leh ui khuahkhirhna dan te sawrkarah theh luh a ni tawh tih sawiin, PAHOSS sum bang aṭangin cheng vaibelchhe 20 chu LMC tan dah a nih angin rotling tak siam nan hman a ni ang, a ti a. Dawr siam phalna mi 750 hnenah pek a nih thu te, bawlhhlawh sawngbawlna tur hmun hnihah peih fel ṭep a nih thu te, bawlhhlawh thliar tura hma lak mek a nih thu te, faina lama hma laknaah khawlai phiat faitu sanitation worker 24  an awm mek thu leh ward fai inelna LMC Award 2024 lawmman chu nakkum March-ah sem tum a nih thu te a sawi. 

LMC Chairman chuan thawktu 36 lak phalna sawrkarin a pekah sum indaih lohna avangin post nghet 5 leh nghet lo mi 13 lak tum mek a nih thu sawiin, Urban Local Body (ULB) an nih tak avangin property tax 3.42%-a lak a nih dawn thu leh heta ṭanga 80% hi veng chhung hmasawnna hna thawh nan hman a nih tur thu a sawi a. LMC chuan Convention Centre an enkawl tawh thu sawiin, Saikuti Hall pawh an enkawl dawn tih a sawi a. Nakkumah chuan Krismas dawnah veng chei ṭha lawmman pek tum a nih thu sawiin, kuminah pawh mahni in leh a vel, khawpui te thianghlim taka vawng ṭheuh turin Lunglei mipuite a chah a ni.

Vawiina LMC hotute leh thu thar la khawmtute inkawmnaah hian LMC Chairman Pu Lalzuithanga bakah, Vice Chairman Pu K. Lalrinawma, Executive Councillor Pi Lalhruaitluangi Sailo leh Chief Executive Officer Pu Donny Lalruatsanga te an tel a. December ni 2, 2024-a chatuan ram pan ta, MJA member Pu Johan Lalhmunmawia, DDK Stringer sunna hun hman niin, LMC aṭanga an ralna sum chu Pu Johan Lalhmunmawia nupui ai awhin District MJA President Pu Laltlanthanga chuan a dawng a ni.