865/2026-2027

Lunglei, 2026 Nikir thla ni 5: Lunglei Municipal Council (LMC) huaihawta Lunglei khawpui chhunga Fai Inelna kalpui tur hawnna leh bawlhhlawh thliar hran leh sawngbawl dan, Solid Waste Management Rules, 2026 chungchang zir hona hun chu vawiin khan World Environment Day pualin Convention Centre Hall, Lungleiah buatsaih a ni.

LMC Chairman Pu Lalzuithanga'n Lunglei Municipal Council huam chhunga veng fai inelna kalpui tur chu a hawng a. LMC huam chhunga veng hrang hrangte chu huang (category) hnihah ṭhenin, veng lian zualte category I-ah an awm ang a; a bak chu Category-II ah awmin, inelna hi ṭhuang hniha kalpui tur a ni.

LMC Chairman Pu Lalzuithanga chuan Lunglei mipuite chu thil ṭha tih kawnga inlungrual leh ṭang rual thei tur an nih thu sawiin, faina kawngah ṭan la deuh deuh turin mipuite a ngen a. Fai Inelna chu inelna thianghlim leh hmasawnna atan hman tum tur te, mahni khawpui hmangaihna rilru nena theih tawp chhuah zel tur te'n Lunglei mipuite a sawm.

LMC Vice Chairman & Municipal Sanitation Committee Chairman Pu K. Lalrinawma'n hun kaihruaiin, Lunglei mipuite chu faina kawngah thawhpui an nawm thu leh faina kawngah LMC chuan theih tawp a chhuah zel tur thu a sawi.

LMC Secretary Pu Lalremruata Sailo chuan bawlhhlawh thliar hran leh sawngbawl dan bakah, veng fai inelna endikna tehfung ruahmante a sawi fiah a. Solid Waste Management Rules, 2026 chu April 1, 2026 aṭanga hman ṭan a nih thu sawiin, he dan hnuaia State Sawrkar, Municipality, Local Council leh mimal mawhpurhna hrang hrangte a sawi fiah.

He hunah hian Local Council member-te nen zawhna leh chhanna leh sawi hona hun hman a ni bawk a. LMC Chief Executive Officer Pu Lalhmansanga chuan lawm thu sawiin hun a khar.