864/2026-2027 

Dated Khawzawl, the 5th June, 2026 : Vawiin khan DRDO Conference Hall, Khawzawlah Directorate of Commerce & Industries, Govt. of Mizoram huaihawtin Khawzawl Cluster-a puantahtute hnena workshed sakna tur leh puantahna khawl semna hun hman a ni a. Dr. H. Lianzela, Secretary, CIG&M Dept chuan khuallian niin a hmanpui a, Pu K. Lalhmuakliana, DCIO, Khawzawl chuan he inkhawm hi a kaihruai. 

Khuallian Dr. H. Lianzela chuan thusawiin vawiinah Khawzawl District puantahtute hmasawnna tur atana pawimawh tak pakhat puantahna khawl leh insakna tur sum leh pai semna hun hman a ni thei chu lawmawm a tih thute, puantah hi eizawnna tling, chhungkua mai bakah ram leh hnam thlenga min phochhuaktu tha tak a nih ziate sawiin, tualchhung mamawh, kan district chhung mamawh tal phuhruk thei tura tan la turin tanpuina dawngtute chu a sawm a. Sawrkar tel leh tello pawha kal thei turin Khawzawl district hian handloom lamah theihna a neih thute sawiin, khawl leh a insakna tur sum leh pai an pekte hluihlawn emaw thildanga hmanglo tur leh hmang tangkai ngei ngei turin a chah a. Anmahni tan mai bakah khawtlang, district leh ram tan malsawmna tur a ni a ti a. Export quality tha leh felfai nei thei tura ngaihtuahna hmang zau turin a chah bawk a. Khawzawl district thar hmasawn zelna turah hian office-a thu te chauh hi an pawimawh lo a, in tina khawsate hi kan pawimawh vek a ni a ti a. Chuvangin duhsak tlak leh enzui tlak turin vawiina tanpuina dawngtute chu ke pena hmala turin a sawm a ni. 

He inkhawmah Pu PC Lianchungnunga, PO(HTH) C&I Deptt. chuan technical report a pe a, Bialtu MLA aiawhin a fanu Pi Lalnun Thari’n thusawina hun a nei a,  Pi Hunthianghlimi , DD (HTH) C&I Deptt in lawmthu sawiin hun a khar a ni.