863/2026-2027

Lunglei, 2026 Nikir thla ni 5: Vawiin World Environment Day 2026 lawmna peng khat atan, Mizoram Bana Kaih (Handholding) Scheme hnuaia Mizoram District Transformation Programme (MDTP), Lunglei District hma laknaa din, Lungleia hman nawn theih bungraw dah khawmna leh lak chhuahna hmunpui, 3R (Reduce, Reuse, Recycle) Centre hmasa ber, Chanmari-a mi chu Lunglei District Bawrhsap Pi Navneet Mann chuan ṭangkai taka hman turin vawiin khan a hawng a. He Project hi Lunglei District Urban Development Office (DUDO) te'n buaipuiin, bawlhhlawh tihtlem, hman nawn leh ṭangkai zawka hman a nih theih nana bungraw hlui la hman tlak site dah khawmna leh a thlawna lak chhuahna hmun atana ruahman a ni.

He huna Khuallian, Lunglei District Bawrhsap Pi Navneet Mann chuan 3R Centre hi hawngin, a chhung fang kualin a en nghal a. Lunglei leh Mizoram chhim lama 3R Centre hmasa ber tur hawn a ni ta chu lawmawm a tih thu sawiin, 3R Centre chu Mizo hnam ziarang, "Sem sem dam dam, ei bil thi thi" tih leh mi dang ṭanpui duhna rilru nen inrem hlea a hriat thu a sawi a. In chhung khura kan bungrua leh thawmhnaw hlui, kan hman ṭangkai loh leh hmun awh khat site a hmang ṭangkai tur leh mamawh zawkte'n an lo chhawr theih nana 3R Centre-a dah chu intihhmuh zel ṭha a tih thu sawiin, 3R Centre hlawhtlin nan MHIP bakah, District mipuite thawhpuina leh ṭawiawmna a ngen a. 3R Centre din a nih theih nana Lunglei District tana Bana Kaih hnuaia MDTP sum petu Mizoram sawrkar leh Chief Minister te chungah lawm thu sawiin, 3R Centre chu chhim lam mipuite tana ṭangkai, hlawhtling tak leh daih rei zawka kalpui zel theih a nih a beisei thu a sawi.

He hun hi Lunglei District Urban Development Officer (DUDO) Pi Lalhruaitluangi'n kaihruaiin, 3R Centre chungchang leh MDTP chungchang a sawi fiah a. Chairman kaihhruaiin kal khawmte'n faina thutiam an sawi rual a. DUDO Lunglei leh Mizo Hmeichhe Insuihkhawm Pawl (MHIP), Sub-Headquarters Lunglei te'n 3R Centre tana bungraw khawn khawm chungchanga thawk ho tura inremna thuthlung an ziak a. MHIP Sub-Headquarters Lunglei President Pi Lalliannguri chuan thu sawiin, 3R Centre hlawhtlinna atana MHIP te'n tha an thawh ve thei chu lawmawm an tih thu leh theih tawp chhuah zel an tum thu a sawi.

Lungleia 3R Centre hawnnaah hian sawrkar official-te, MHIP leh YMA hruaitute leh MJA member-te, Lunglei Government College-a Electoral Literacy Club member zirlaite an tel a. Bawlhhlawh thliar hran leh bawlhhlawh thehthang kawnga fimkhur tura intiamna signature campaign buatsaih nghal niin, Khuallian Pi Navneet Mann bakah kal khawmte'n hming an ziak a. Electoral roll endikna (Special Intensive Revision) kalpui mek chungchang inzirtirna, Voter Awareness Forum & Help Desk buatsaih ni bawkin, voter-te'n hriat duh an neihte inhrilhfiah a ni a. Khuallian Pi Navneet Mann chuan SIR kalpui mekah electoral dik leh felfai tak a awm theih nana ṭha taka thawhpui tur leh hun tiam chhung (May 30 – June 28)-a Enumeration Form theh lut ṭheuh turin District mipuite a chah. 

3R Centre Project hi MDTP, Swachh Bharat Mission-Urban 2.0 leh DAY-NULM te nen ṭang tlanga kalpui niin, Mizo Hmeichhe Insuihkhawm Pawl (MHIP), Sub-Headquarters Lunglei te nen thawh hona ziah a ni bawk a. MHIP te'n member-teah in chhung bungrua hman tawh lohte mi dangin ṭangkai zawka an hman theih nana thawh khawmin, a mamawhte'n a thlawna an lak theih nan ruahmanna siam a ni a. DAY-NULM hnuaia Self Help Group-te'n he'ng bungraw thawh khawm aṭanga thil ṭangkai zawk an siam chhuah (upcycle/recycle)-te man tlawm zawka lei theih turin chhawp chhuah ṭhin a ni bawk ang.

3R Centre hi Chanmari, Lunglei (BCM Biak In ep)-ah awmin, ni tin office hun chhungin hawn ṭhin a ni dawn a. Tun ṭumah hian Lunglei khawpui chhunga MHIP branch pasarih aṭangin bungrua khawn khawm niin, tun thla tawpah branch pasarih dang leh a bak branch pariat dang aṭangin July thlaah khawn leh tum a ni a. Hemi hnu hian mimal remchangte thawh khawm aṭangin hlawhtling taka kalpui chhunzawm zel beisei a ni a. 3R Centre enkawltute chuan mipuite'n an bungraw hlui la hman tlak site mi dangin an hman ṭangkai atan 3R Centre-ah hian pe ṭhin tur leh bungraw mamawhte chuan inthlahrung lova 3R Centre hi pan ṭhin turin mipuite an ngen.