Vawiin khan Lunglei DC Conference Hall-ah Political Party hrang hrang aiawhte tan Election Model Code of Conduct (MCC), Media Certification and Monitoring (MCMC), Election Expenditure Monitoring leh Suvidha chungchang zirhona training buatsaih a ni. He hunah hian Pu K. Lalrohlua PD DRDA, Pu James Lalnithanga Election Officer leh Lunglei District huamchhunga Election kaihhnawih officials te an tel.

Pu K.Lalrohlua, Nodal Officer, MCC chuan zirtirna pein Election Model Code of Conduct hnuaia tih phal leh phal lohte, vantlang hmunah Political Party flag leh banner te tar phal chin te, public meeting neihnaa hman tur aurinna leh hmanraw dang hman phalna dil chungchang te, chi leh hnam behchhan zawnga vote zawn ECI in a phal loh thu te a sawi.

Pi C. Lalremruati, Nodal Officer Media Certification and Monitoring Committee (MCMC) chuan hemi chungchangah zirtirna pein political advertisement chungchanga hriattur pawimawh te, Paid News uluk taka vil thin a nih thu te, Social media hrang hranga advertisement te pawh ECI duh dana vil a nih thu te sawiin Media hmanga Campaign na sum sen te Election Expenditure Report ah tih lan/ tih tel vek tur a nih thu kalkhawmte a hrilh.

Pu TT Lalnumawia, District Level Master Trainer (DLMT) chuan Election Expenditure leh Suvidha chungchangah kalkhawmte zirtirna an pe a. Inthlan vuakveta thil thlengte a bik takin sum leh pai senso chelekte chu ECI in ngun taka a vil reng thu sawiin inthlana sum senso te mumal taka chhinchhiah turin kalkhawmte a chah a. Inthlan felfai tak a awm theih nana expenditure monitoring pawimawhzia sawiin ECI Compendium on Election Expenditure Monitoring chu ngun taka lo zir theuh turin a chah bawk.

Lok Sabha inthlan hmachhawn tura inpuahchahna  chak taka a kal mek zel thu Election Officer Pu James Lanithanga chuan a sawi a. Nodal Officer hrang hrangte ruat fel tawh niin Sector Officer, Assistant Expenditure Observer (AEO), Flying Squad, Video Surveillance Team leh Team dangte tan pawh training buatsaih kan chhunzawm zel dawn a ni, a ti.