2669/2025-2026

Lunglei, 2025 Pawltlak thla ni 15: Lunglei Municipal Council (LMC) ruahmannaa 'Lunglei Ni' hman tur atana Organising Committee chu vawiin khan Lunglei Convention Centre-a LMC BoC Meeting Hall-ah a ṭum li nan an ṭhu khawm.

Organising Committee ṭhut khawm hi Chairman, LMC Chief Executive Officer (CEO) Pu Lalhmansanga'n a kaihruai a. LMC Executive Councillor Pi Lalhruaitluangi Sailo; Co-chairman, Lunglei Sub-Headquarters YMA President Pu K. Lalfakzuala leh Secretary, Sub-Headquarters YMA Secretary Pu Zothanzuala Hnamte te bakah, member-te — sawrkar official, pawl hrang hrang ai awh leh Lungleia mi challangte an tel.

Lunglei Ni hman hun tur atan mei mit lova Lunglei din ṭan ni ruat ṭha tih a nih angin, sawrkar record hlui leh document hrang hrang zir chianna aṭangin mei mit lova Lunglei (Fort Lungleh) din ṭan ni atan March ni 4, 1889 chu pawm tlan a ni a. Lunglei Ni 2026 chu March ni 4, 2026 (Nilaini)-ah C. Ṭhuamluaia Mualah hman ni se, tih a ni.

Lunglei Ni buatsaih tura mawhphurhna hrang hranga hma la tur committee peng 10 ruata hruaitute hnen aṭangin an hma lak tawh chin leh hmachhawp an neihte bakah, budget an ruahman dan report ngaithlak niin, Lunglei Ni hman dan tur chungchanga rawtna leh ruahmanna hrang hrang sawi ho zui a ni a. Organising Committee hma lakna chak zawka bawhzui a nih theih nan leh Secretary ko rip lutuk tur chhawktu leh puitu tur, Assistant Secretary atan Pu H. Lalhmingthanga chu ruat thar a ni bawk.