2670/2025-2026

Lunglei, 2025 Pawltlak thla ni 15: NITI Aayog hnuaia Aspirational Blocks Programme (ABP)-a Lunglei District (Lungsen Aspirational Block) tana Central Prabhari Officer (CPO) tura ruat, Ministry of Mines Deputy Secretary Pi Geetika Sharma, IAS-in December ni 22, 2025 (Thawhṭanni)-a Lungsen Block tlawh a tum chungchangah, amah lo dawnsawn dan tur ngaihtuahin vawiin khan Lunglei District Bawrhsap Pi Navneet Mann hovin a hna thawh pindanah sawrkar official-te an ṭhu khawm.

Bawrhsap Pi Navneet Mann chuan CPO hi NITI Aayog aṭanga ruahmanna awm sa anga Lungsen Aspirational Block-a hma lakna hrang hrang endik tura lo kal tur a nih thu sawiin, ABP hnuaia Lungsen Block-a hma latu department hrang hrangte chu an hma lakna ṭha taka pho lang thei turin theih tawp chhuaha lo inbuatsaih turin a chah.

He hunah hian CPO-in Lungsen a tlawh huna hma lakna hrang hrang a tlawh turte leh hun hman dan tur ruahman lawk tlangpui thlir ho a ni a. Hlawhtling tak leh tluang taka hun hman a nih theih nana inpuahchahna leh inbuatsaihna tur thil ṭul leh pawimawh hrang hrangte sawi ho a ni.

Ruahman lawk dan chuan, CPO hian December ni 21, 2025 (Pathianni)-ah Lunglei thlengin, zan a riak ang a. December ni 22, 2025 (Thawhṭanni) zing dar 10-ah Lungsen BDO Conference Hall-ah DC leh BDO te nen Lungsen Block-a hma lakna hrang hrang an thlir ho ang a. Hemi zawh hian Lungsen PHC & Health ATM, Lungsen Futsal Ground, Lungsen Senior Secondary School & Cosmic Classroom, Community Centre sak mek, BDO Office, MzSRLM & SHG exhibition, Anganwadi Centre-IX leh agriculture/horticulture farm te a tlawh ang a. December ni 23, 2025 (Thawhlehni)-ah Lunglei a chhuahsan ang.