2267/2024-2025

2024 Mimkut thla ni 27: Vawiin khan Lunglei DC Conference Hall-ah Lunglei District, Siaha District leh Lawngtlai District-a election official - electoral registration officer (ERO)-te leh data entry operator-te tan ERONet 2.0 kal tlanga vote thlak hmun (polling station) ṭhen hran leh thliar fel dan a taka zir hona buatsaih a ni.

He hun hi Election Officer Lunglei Pi R. Lalrinzuali'n a kaihruai a. Election Officer Lawngtlai Pu Collin Hlychho chuan training pein, ERONet 2.0 kal tlanga polling station siam rem theih dan a thua a sawi fiah bakah, a takin tih chhin nghal a ni a. Zawhna leh chhanna leh sawi hona hun hman a ni bawk.

He training-ah hian chhim lam district pathum huam chhunga assembly bial 11-a ERO-te leh anmahni puitu data entry operator-te an tel a ni.

Election Commission of India (ECI) chuan ERONet hman lai chu tichangtlungin, polling station siam rem, ṭhen hran leh thliar fel te chu state hmunpuia Chief Electoral Officer (CEO) office-a khawih kher ngai lovin, district election office ṭheuh aṭanga khawih theih tawh turin a siam a. Hei vang hian rang leh felfai zawkin polling station thliar fel, ṭhen hran leh siam rem pawh a tih theih tawh dawn a ni.