362/2025-2026
Lunglei, 2025 Ṭau thla ni 28: Aspirational Block Programme (ABP) hnuaia Lunglei District chhung Lungsen RD Block-a hma lakna kalpui mekah vawiin khan Lunglei District Bawrhsap Pi Navneet Mann hovin a hna thawh pindanah hriselna leh chaw ṭha (health & nutrition) chungchanga hmasawnna tur leh hma lak zel dan tur sawi ho a ni.
He hunah hian District Immunisation Officer, District Programme Officer (WCD), Sub-Deputy Commissioner, Medical Officer Lungsen, Child Development Project Officer Lungsen leh Aspirational Block fellow te an tel a. Hmasawnna tehfung atana thlan bik, Key Performance Indicator (KPI) hrang hranga hmasawnna te thlir ho niin, hmasawnna tha zawk leh chak zawk a awm theih nana hma lak dan tur rawtnate sawi ho a ni.
Kumin May leh June thla chhungin Lungsen Block chhungah hian Health Awareness leh NCD Campaign buatsaih ni se tih niin, thisensang leh zunthlum endik tur target atan kum 30 chin chung lam mi 3,000 aia tlem lo tinzawn a ni a. Raipuarte a hun taka chhinchhiah (register) an nih a, chaw ṭha (supplementary nutrition) pawh ṭha taka an dawn theih nan hma lak chhunzawm ni se, hma la ṭhate tan lawmman pawh siam ni se, tih a ni a. Raipuar awm zat hriat nan bakah, raipuarte'n an rai aṭanga thla thum chhunga ANC registration an tih ngei theih nan leh chaw ṭha tlak chham vanga natna Severe Acute Malnutrition (SAM) leh Moderate Acute Malnutrition (MAM) dinhmun te hriat chian a, a su kiang tura hma lak a nih theih nan Village Health, Sanitation & Nutrition Committee (VHSNC) te kal tlanga zir chianna (survey) neih te rel a ni bawk.
