418/2025-2026
Lunglei, 2025 Ṭau thla ni 30: Aspirational Block Programme (ABP) hnuaia Lunglei District chhung Lungsen RD Block-a hma lakna kalpui mekah vawiin khan Lunglei District Bawrhsap Pi Navneet Mann hovin a hna thawh pindanah sector hrang hranga hmasawnna tur leh hma lak zel dan tur sawi ho a ni.
Vawiin ṭhut khawmah hian basic development, social development leh agriculture & allied service te thlur bing niin, Additional Deputy Commissioner Pi Rochuangkimi Khenglawt bakah, PHED, DCSO, DAO, DHO, DAHVO, Lungsen BDO leh MzSRLM official-te an tel a. Hmasawnna tehfung atana thlan bik, Key Performance Indicator (KPI) hrang hranga hmasawnna te thlir ho niin, hmasawnna ṭha zawk leh chak zawk a awm theih nana hma lak dan tur rawtnate sawi ho a ni a. May ni 9, 2025-a Lungsena "I kawtkaiah sawrkar" tih programme huaihawt turah department hrang hrangte'n awareness ṭha taka kalpui tum ni se, block chhungah hmasawnna tluantling leh tlo a awm theih nan theih tawp chhuah zel ni se, tih a ni.
