Vawiin khan CMO Office Chamber-ah Dr.Lalrinthangi, District Immunization Officer hovin Immunization chungchang media mi te nena sawihona hun Sensitization meeting neih a ni. He hunah hian Lunglei CMO Dr Thani Pachuau, Medical Superintendent Dr SR Ngurchamliana ten thu sawiin Lunglei District media mi te an tel tha hle.

Dr.Lalrinthangi, District Immunization Officer chuan Sensitization meeting ngai pawimawha media mi thahnem tak an kalkhawm avangin an chungah lawmthu a sawi a. Naupang leh nu raipuar te tan a Vaccine pek te- engvanga pe nge an nih leh a thatna te chipchiar takin a sawifiah a, Vaccine pek that avangin Smallpox (zawnghri) pawh Khawvel atanga umbo a ni tawh a, Nu raipuar leh nausen thla 1 hnuailam a tetanus pawh Vaccine lak that avanga a awm tawh loh thu ngaihthlak a ni bawk.

Tun dinhmunah National Immunization Schedule-ah Vaccine 9 pek mek niin Vaccine thar ROTAVIRUS VACCINE (RVV) pek tur nen vaccine 10 an pe tawh dawn a ni. Vaccine te hi Private ah chuan cheng sing chuang senna a ni a, chu chu Sawrkar in a thlawn vekin an pek thu ngaihthlak a ni.

Health Department –in vaccine dang chi hrang hrang a pek chhuah mek Routine Immunization-ah damdawi thar ROTAVIRUS VACCINE (RVV) pek chhuah tum a ni a. Hei hi naupang kawthalo natna thlen tu tam ber inkaichhawn awl em em  Rotavirus natna laka invenna Rotavirus Vaccine a ni. Rota virus vaccine hi Routine immunization ( A nawlpuia vaccine pek thin) zingah khawvel ram 96 ten an telh tawh a. He vaccine hi World Health Organization (WHO) position paper-in him tawkah a puan tawh thu tarlan a ni bawk. Naupang Vaccine la thar tur kar 6 an nih atangin pek tan tur a ni a, Dose 3-kar 6, kar 10 leh kar 14 ah te pek tur a ni. Rotavirus vanga kawthalo hi a venna awmchhun chu Rotavirus Vaccine chauh hi a ni a, ka a thlawr tur a ni.