July ni 22 Thawhtanni tlai dar 4:30 khan School Education Department leh DDK Aizawl ten School Education Minister Office chamber-ah kum khat chhunga thawhhona tur Memorundum of Agreement (MoA) an ziak. He thawhhona thuthlungah hian School Education Department aiawhin Pi Esther Lalruatkimi Commissioner & Secretary-in hming a ziak a, Doordarshan Kendra aiawhin Pu Wongchan Ramsan Head of Programme chuan a ziak a, Pu Lalchhandama Ralte School Education Minister-in hriatpuina a ziak bawk a, School Education Director Pi Lalzarmawii leh DDK Programme Executive Pi Lalbiakkimi Ralte ten hriatpuina an ziak bawk a ni.

Pu Lalchhandama Ralte chuan kum 2015 atanga thawhho tawh chhunzawmna tura inremna ziah a ni leh thei chu lawmawm a tih thu leh chumi tihlawhtling tura amah ngei a awm thei chu lawmawm a tih thu a sawi a. Kan ramin zirna kawnga hma a sawnna phochhuahna tur leh mipuite kawng dik kan kawhhmuh theihna tur te, Zirna tha mi nawlpuiin kan chanho theihna tura he programme siam a ni chu lawmawm a tih thu sawiin zirna lama hmasawnna rahbi thar kan zawhna hmanraw tangkai anih theih a beisei thu a sawi. He thuthlung ziahnaa kalkhawmte chu Mizoram zirnaa mi pawimawh vek an nih hlawm avangin he thuthlung ziah kan ngaih pawimawhzia a tarlang hle a ni a ti bawk.

He thuthlung ziahnaah hian School Education Department-a Officer te, DDK Programme Officer te, MBSE leh SCERT Officer te, District tina District Education Officer-te leh Service Association hruaitute an tel a. School Education Director kaihhruaina hnuaiah State Level Advisory Committee-in Programme tihchhuah dan tur a ruahman ang a, Media Cell-ten programme an siam thin dawn a ni. He Programme Zirna huang hi DDK Aizawl-in chawlhkar tin Ningani tlai dar 6:00 - 6:30 chhungin a tichhuak ziah ang a, kum khat chhungin episode 52 tihchhuah a ni ang a. School Education Department hian he programme puanchhuah man broadcasting fee hi a chawi zel dawn a ni. School Education Department hi MBSE leh SCERT te nen an thawkho ve leh ang a, mipuite hnena puanzar tur pawh hi an thawhkhawm ve leh dawn a ni.

Attachment

  • Loading attachment...