91/2022-2023
Lunglei, the 8th April 2022: Vawiin khan Lunglei Press Club ah kangmei chungchang media mite tana zirtirna ‘Special Training On Fire Safety And Fire Prevention for Media Personnel’ neih a ni.

Training program-ah hian Pu T. Lalchhandama, Station Officer, Fire & Emergency Services (F&ES) Lunglei chu resource person niin Lunglei District MJA member-te, Cable TV thawktute, AIR, I&PR leh F&ES thawktute an tel a ni.

Training-ah hian kangmei chhuah theih dan leh a hlauhawm dan te, leh fimkhur dan tur kawng hrang hrangte zirho anih bakah fire extinguisher hman dan te zirho a ni.

Kum 2021 khan Lungleiah kangmei F&ES tena an thelh ngai tum 29 awmin hengte hi chenna in kang pahnih (Pukpui leh Chanmari), ram kang vawi 19 leh bawlhhlawh paihna hmun kang thelh ngai tum 7, leh gas kang vawi 1 te an ni. Heng kangmei chhuak avanga bungrua chhia te hi Rs. 6,25,000/- man hu a chhut a ni. Kumin 2022 hian kangmei chhuak tum 9 report tawh niin hengte hi chennain kang 3 (Venghlun, AOC leh Lunglawn), bawlhhlawh paihnahmun kang tum 4 leh ram kang tum 2 a ni. Bungrua chhia te hi Rs. 2,80,000/- man hu a chhut a ni.

Fire & Emergency Services (F&ES) Lunglei ah hian Department thawktu mi 8 awmin kangthelh motor (fire tender) pahnih a awm a. Thawktu indaihlohna avangin 2nd MAP atangin mi 7 dah an ni.

Kangmei laka mipuite kan him tlan zawka nana hriattur pawimawh te chu:

1. In kan chhuahsan dawn emaw, kan mut dawnah te kan inchhungah leh kan inbulah kangmei tichhuak thei thil a awm leh awm loh uluk takin enfiah thin tur a ni e.
2. Petrol, diesiel, khawnvartui te hi mei atanga hla taka dah thin tur a ni.
3. Mombati, bati te inchhung parda, puanzar leh thosilen bulhnai-ah te chhit loh tur a ni.
4. Thuka meichhem te kalsan dawnah uluk taka tihmit thin tur a ni.
5. Vawk chaw chhumna atang hian kangmei a chhuak duh viau a, kalsan dawnah uluk takin mei tihmit thin tur a ni.
6. Electric wiring tha lo avangin kangmei a chhuak nasa hle a, electric wiring te uluk taka endik thin tur a ni a, a thiamte chauh wiring khawih thin tir tur a ni. Electric hmanrua tha chauh hman thin tur a ni.
7. Ar vulhna a current kan pawhluh thin hi uluk takin endik reng thin tur a ni.
8. Electric hmanrua Heater, cooker, istiri etc te hi on chungin kalsan loh tur a ni a, hman zawhah plug atangin phawi zel tur a ni.
9. Kan in bul hnaite uluk takin tihfai thin tur a ni a, kangmei ti chhuak thei bawlhhlawh leh thil kang awlsam chite inbulah chhehkhawm teuh loh tur a ni.
10. Gas cylinder kan thlak dawnin a bul hnaiah mei tih nun loh tur a ni.
11. Meizial bung a nung chungin paih mai mai loh tur a ni.
12. Kangmei a lo chhuahin chiai mai lovin, rang takin Lunglei Fire Station phone No. 0372 2325366/0372 2324101/8794889383 ah te hriattir vat thin tur a ni.