90/2022-2023
Aizawl 8th April, 2022 : Dr. R. Lalthangliana, Commerce & Industries Minister chuan vawiin khan Aijal Club Park-ah State Handloom Expo ni 14 (8th - 21st April, 2022) awh tur a hawng. He Expo hi Office of Development Commissioner for Handloom, Ministry of Textiles, Govt. of India bultum niin Handloom, Textile & Handicrafts Wing, Commerce & Industries Department in a buatsaih a ni.

Dr. R. Lalthangliana chuan COVID - 19 dona kawnga mipui ten thu kan awihnaah lawmthu sawiin vawiin programme ang buatsaih theih a ni te hi kan thuawihna rah duhawm pakhat a ni, a ti.

Minister chuan Mizo Weavers te hi Mizo te hnamzia pholangtu pawimawh tak an ni a, hnamdang hmelhriattirtu hmanraw tangkai tak a ni, a ti bawk. Mizoram pawnah kan puantah hi ngaihhlut a nih thu sawiin Minister chuan puantahtute hian tun aia mawi leh quality tha an tah thei a ni tih hre rengin hmalam pan zel turin duhsakna a hlan.

State Handloom Expo ah hian stall 30 awmin, stall zawng zawngah hian a tam ber chu Aizawl leh a chhehvel atanga puantahtute an ni a. Heng bakah hian Sailam, Mualthuam North, Thenzawl leh Khawbung atangin an rawn tel a ni. State Handloom Expo hi Ministry of Textile, Govt. of India hnuaia Development Commission for Handloom hnuaia scheme pakhat a ni a. Handloom product te zau zawka mipuiin an lei theihna tura state pum huapa Exhibition buatsaih hi a tum ber a ni.

Expo hawnna inkhawmah hian Pu C. Lalrammawia, Chairman, ZOHANDCO leh Pi Florence Zotluangpuii, Director, Commerce & Industries ten thusawina hun an nei.