88/2022-2023
Aizawl, the 8th April 2022: Nimin (April 7, 2022) chawhnu khan Pu TJ Lalnuntluanga, Minister of State for Environment, Forest & Climate Change Department(EF&CCD) chuan Tamdil-ah Tamdil Wetland Resource Development & Sustainable Livelihood Improvement Project(TWRD&SLIRP) a hawng.

He programme hawnna hunah hian Pu TJ Lalnuntluanga, Minister chuanTamdil khaw hrang hrang atanga mipui kalkhawm te chu he project avanga hamthatna an dawn turah a lawmpui tih a sawi a. India leh Mizoram sorkar ten he Tamdil enkawl leh humhalh hi a ngaih pawimawh em avangin a bul hnaia cheng te chuan theihtawp an chhuah bakah neitu nihna an chang thiam hle tur a ni a ti. He project hi chhunzawm zel tur a ni dawn a, Government of India-in hemi project atana senso EF&CCD in ruahman cheng nuai 980.81 a pawmpui tawh a. Tun kuma pawisa dawn tawh chu cheng nuai 202.95 a ni a. A bak pawh hi an la rawn pe chhunzawm dawn a ni a ti. Forest Minister chuan Tualbung Village Council ten helai ram sorkarin cheibawl theihna tura an hlan chu lawmawm a tih thu thusawiin khaw dang pawhin an tih ve hun a nghahhlelhawm hle a ni a ti.

TWRD&SLIRP hi Tamdil leh a chheh vela khua ten ramngaw humhalh zelchunga eizawnna ngelnghet an neih theihna tura ruahman a ni a. He project hnuaiah hian kum 5 chhungin chhungkaw 530 laiin eizawnna ngelnghet an neih theihna tur ruahmanna a tel a ni. Tunah hian chhungkaw 206 laiin eizawnna ngelnghet an neihtheih nan chhawmdawlna peka ni a. He hmalakna turah hian Lakhuihthei leh Balhlahuan siam turin chhungkaw 106 thlan an ni a, kutthemthiamna lam kawnga eizawnna turin chhungkaw 100 hnenah tanpuina pek a ni bawk a ni.

He project hawnnaah hian Pu Jitendra Kumar, Principal Secretary, EF&CCD, Pu Ritu Raj Singh, Chief Widlife Warden leh Pu Laltlanhlua Zathang, DFO Aizawl pawh an tel a ni.