April ni 8, 2022: Nimin (7.4.2022) khan Chief Minister Pu Zoramthanga leh Lengteng bialtu MLA Pu L.Thangmawia chuan HRD Board hmalakna chungchang leh Lengteng bial chungchangah Chief Minister office-ah an inkawm.

Pu L.Thangmawia chuan Chief Minister hnenah hian a bialchhunga hripui leng kara hmasawnna tamtak, Mimbung leh Sinzawl inkar lei siamthatna te, Kawlkulh to NH 6 inkar siamthatna tur cheng nuaih zariat chuang a ruahman sak a vang te, Kawlkulh leh Ngopaa Futsal Ground changkang tak siamna tur a ruahman sak avang te, Mimbung leh Tuivai inkar kawng laihzauna tur a ruahman sak avang te, Hliappui to Aiduzawl kawng tana ruahmanna a siamsak avang te, Pawlrang Field laihna tur a ruahman sak bakah NE Khawdungsei tana Tuivai kawng, MLA Fund hmanga bul a lo tan, sum indaihlohna phuhruk nana CM in ruahmanna a siamsak avangin lawmthu CM hnenah hian a sawi a. Ngopa leh NE Khawdungsei a Tennis Court tih changtlun nana ruahmanna mumal tak a siamsak avang leh Ngopa in kum 2024-a KTP Genral Conference a thlenna atana inbuatsaih na atana special package, cheng nuai 50 a ruahman sak avangin lawmthu a sawi a, KTP General conference thleng tura Ngopa khawtlang inruahman dan leh an mamawhte a thlen bawk a ni.

Pu L. Thangmawia chuan zirtirtu thar lak theih a nih loh laia SEDP atanga Education Minister Pu Lalchhandama Ralte kaihhruai, HRD Board kaltlanga zirtirtu zanga (500) chuang lawmman tur SEDP atanga a pek avangte leh thil dang tam tak a beisei phak bak CM in zirna a ngaih pawimawh avanga sum harsa kara a tihhlawhtlinsak avangin lawmthu a hrilh a. Zirtirtu tamtakin an hlawh thawh khawma zirtirtu an rawih thin te leh khawtlangin mamawhna avanga vantlang suma zirtirtu an rawih thin te chu hei hian nasa taka a chhawk zangkhai thu CM hi a hrilh bawk. Chief Minister hian Primary school leh Middle school a zirtirtu la indaihloh zualna, khawtlang hruaitu ten an thlen mek phuhruk nan SEDP atangin, a hmaa a lo pek tawh bakah zirtirtu sawmthum(30) lawmman tur a lo pek belh leh a ni.