No.7578/2020-2021

UD&PA Department buatsaih ‘Cleanliness Competition in Urban Mizoram - 2020’- a Lunglei khua in lawmman sang ber pahnih a dawn ‘Overall Cleanest Town’ leh ‘1^st Rank for District Headquarter’ te pualin Lunglei khawpuiah ni hnih chhung (18^th & 19^th February 2021) lawmna leh faina kawnga hmalakna neih niin nimin khan Lunglei khawpui pum huap hnatlang ‘Leitlangpui Faina Hnathlangpui’ hlawhtling taka neih a nih hnuah vawiin chawhnu dar 1:30 khan Convention Centre-ah a lawmna inkhawm ropui tak neih a ni. He hunah hian Agriculture Minister Pu C.Lalrinsanga, Lunglei West bialtu MLA chu khuallian a ni.

Mizoram Khawpui Fai Ber Lawmna program-ah hian Lunglei HPC Vice Chairman Pu Lawmawma Tochhawng, UD&PA Director Pu H Lianzela, Chief Engineer I&WRD Er Lalrotluanga, Agriculture Department Director Dr H Saithantluanga leh sawrkar official dangte, tlawmngai pawl hrang hrang aiawhte, khawtlang hruaitute leh sawm bik dangte an tel a ni.

Vawiin program Pu R.Vanrengpuia, Addl DC & Chairman, Lunglei Sanitation Task Force kaihhruaiah Agriculture Minister Pu C.Lalrinsanga chuan Mizoram khawpui fai inelnaah Lunglei in lawmman sang ber pahnih a ruala dawng thei chu ropui a tih thu sawiin he dinhmun thleng thei tura rim taka thawka hun leh tha nasa tak seng tute Nodal Department UD&PA, khawtlang hruaitute, tlawmngai pawl hrang hrangte chungah lawmthu a sawi a. Faina chuan mihring nuna thil pawimawh hrang hrang hengte taimakna, hriselna, rilru thianghlimna, changkanna leh hmasawnna te a keng tel tlat a ni tiin tuna chawimawina hlu tak kan dawn te hi abul tanna chauh a ni tih hriaa mahni zawn theuha tan la turin Lunglei mipuite a sawm a. Kan khawpuiah te aina tluantling leh daih rei kan neih theihnan naupan tet lai atanga hemi kawnga inzirtir a tul takzet a ni tiin elementary school level atanga college thleng inzirtirna leh awareness ngawrh taka zirtirna kan kalpui a tul a ni, a ti bawk.

Pu Andrew Lalhruaia, DUDO Lunglei chuan he hunah hian report pe in faina kawnga Lunglei hmalakna tlangpui a tarlang a.  Lunglei chu Open Defecation Free + (ODF+) dinhmun nei tura inpuahchah fel tawhin endiktute (inspection team) lo kal nghah mek a ni a. Lunglei khawpui chhung in tin atangin bawlhhawlh lak niin 100% door to door collection dinhmun kan nei mek a. Commercial area bikah te nodal department UD&PA chuan bawlhhawh bawm 600 chuang a hung chhuak a. Faina kawnga inzirtirna pawh ngawrh taka kalpui niin school, college, kohhran leh pawl hrang hrangah Awareness Campaign neih thin a ni a. Lunglei khawpui hmun lun lai 100 chuangah faina chungchang inzirtirna thuziak permanent hoarding tar chhuah a ni bawk. Hemi bakah hian faina kawngah Community Participation ngaih pawimawh niin mipui mimir, khawtlang hruaitute leh pawl hrang hrang te hmalak pui an ni a, Lunglei town area chhunga VC zawng zawng te VC Sanitation Committee din pui an ni a, faina hnatlang koh thin a ni. Lunglei khawpui leh a chhehvelah thing humhalh leh mass plantation kalpuina hmun Urban Forest pasarih (7) enkawl mek a ni bawk. Hemi bakah hian MUP Sanitation Volunteer te ruat niin kum tluana faina kawnga hmalakna Leitlangpui Faina Calendar te buatsaih a ni.

Vawiin program-ah hian HPC Vice Chairman Pu Lawmawma Tochhawng leh UD&PA Director Pu H Lianzelate pawhin thusawina hun hmangin Pu F.Lalzawmliana, Chairman, Lunglei Town VC Welfare Committee chuan lawmthusawina hun a hmang a ni.

Mizoram Khawpui Fai Ber Lawmna-ah hian Lunglei khawpui faina kawnga hun leh tha leh ngaihtuahna nasa tak senga hmalatu hrang hrang te – Lunglei town area VC 24-te, YMA Sub Hqrs, Lunglei, MUP, MHIP leh Clean Lunglei te lawmthu sawina leh chawimawina citation hlan an ni a. Hemi bakah hian faina kawnga theihtawp chhuaha tha leh mahni sum hial senga hma la thin mimal thlanchhuah mi paruk hnenah chawimawina leh lawmthu sawina citation hlan an ni bawk. Chung mi te chu:

1.     Pu F Lalsanglura, Rahsiveng

2.     Pu KT Chhawna, Chanmari

3.     Pu Lallianpuia, Salem Veng

4.     Pu Lalfakzuala Colney, Electric Veng

5.     Pu Chawnghranga, Electric Veng

6.     Pu RTC Phirthanga, Electric Veng

Mizoram Khawpui Fai Ber lawmman dawn hi Lunglei khawpui mipuiten an ngai hluin faina kawnga ke pen zel turin mipuite a chawk phur hle a. Nimin Leitlangpui Faina Hnathlangpui neihah mi 8000 chuang hnatlang tura thawk chhuakin Lunglei khawpui hmun hrang hrang an ti fai a ni. Lunglei Sanitation Task Force chuan Lunglei mipuite chungah lawmthu sawiin faina lama hma kan sawn zel theihnan mipuite thawhho pui zelah a sawm bawk a ni.