No.7577/2020-2021

Vawiin khan kum ruk (2015-2021) chhunga Mizoram Science Centre hmalakna hrang hrangte Dr. R.K. Lallianthanga, Chief Scientific Officer leh Member Secretary hovin thlirletna neih a ni.

Dr. R.K Lallianthanga, chuan thawh hona tha tak avangin kum ruk chhungin Mizoram Science Centrein nasa taka hma a sawn thu sawiin, Mizoram Science Centre-a thawkte kawng hrang hranga hmasawn turin a fuih a. Science Centre a thawkte chu Science leh Technology lamah an tui a pawimawh zia te, a tlawhtute hlim taka lo dawngsawnga, mi zawng zawng tana tlawh nuam tura siam a tul thu te, Mizoram thil bik mipuite entheih tura telh belh zel tura hmalak a tul thute a sawi. Mizo mipuite tana rawngbawltu, Science lam rilru puttirtu ni tura hmanrua an nih avangin inzir chhunzawm zela thahnem ngai taka thawk turin a fuih a. Superannuation pension-a chhuak mai tur anih avangin thlahna thu sawiin, Science Centre-a thawktu zawng zawngte hun lola kal tur atan duhsakna a hlan bawk.

He Review Meeting-ah hian Pu F. Lalramchuana, Senior Scientific Officer leh Senior Curator, Mizoram Science Centre chuan kum ruk kal ta chhunga an hmalakna te powerpoint hmangin report a pe a.

Mizoram Science Centre hi July ni 26, 2003 ah hawn a ni a, March ni 2 2017 ah Autonomous Government Institution-ah Mizoram sawrkarin a dah a. Kum 2015 khan thawktu nghet 5 leh nghet lo 7, an vaiin 12 an nih laiin, tunah hian thawktu nghet 20 leh thawktu nghet lo 4, a vaiin 24 an awm mek a ni.  

Tun kum 6 chhunga hmasawna langsar deuh deuh te chu: Innovation & Space Education Centre din te, 250Kva Transformer bun te, 50Kwp Solar rooftop bun te, a panna kawng leh footpath siamthat te, 16” dia Dobsoniam Telescope neih thar te, Exhibit item engemaw zat siam that leh dah thar te a ni a.

Tunah hian Lunglei Science Centre & Digital Planetarium din mek a nih a ni a. Hei bakah hian Science Centre in an ngen angin Indian Air Force chuan TTLE Airframe model HPT-32 an rawn thawn tawh a, hei hi a hma thei ang bera pho chhuah tura hmalak mek a ni.