Vawiin hi India ram in zalenna a hmuh champha Independence Day vawi 72-na a ni a; Lunglei District-ah ropui taka lawm niin a lawmna pui ber chu Thuamluaia Mual Lunglei-ah Pu John Rotluangliana Hon’ble Minister FCS&CA, Transport, Tourism Departments hovin urhsun taka hman a ni. Khuallian Pu John Rotluangliana chuan Hnam Puanzar pawtparhin, Parade Contingent 24-te Hnam Puanzar chibai bukna a chhang let a; Independence Day thuchah a sawi hnuah Parade intihsiakna a tithate leh Independence Day puala Sports Association-te intihsiakna hrang hranga tithate hnenah lawmpuina a hlan bawk.

Pu John Rotluangliana chuan Ram dang awpbehna laka kan ram hruai chhuak tura kan hnam pa Mahatma Gandhi te, Pandit Jawaharlal Nehru te, Sardar Vallabhai Patel te leh midangte inhlanna kan hre reng a ni tiin zalenna kan neih theihna tura he ram ropui tak din tute beisei leh hmathlir hlen chhuak turin inhlan thar ang u, a ti aHe ram ropui taka cheng te hian inpumkhatin, hmasawn zel tura lung rual taka rilru kan siam theuh a pawimawh a ni tiin New India, 2022 hmathlir ti puitling tura tan la turin kalkhawmte a sawm.

Khuallian chuan Sawrkar hmalakna hrang hrang tarlangin Mizoram Sawrkar Flagship Programmes NLUP leh NEDP chuan kum reilote chhungin kan ram khawsak ei leh barah hmasawnna tam tak a thlen a.  Kum li chhunga kan economy thanna hi zaa 8% aia sang niin, India rama state hmasawn ber pawl kan nih thu a sawi a. Heng hlawhtlinna hian eizawnna ngelnghet leh rintlak zawk chhungkaw tam tak a siam sak bakah retheihna um bo mek niin BPL chhungkua za zela 21(%) chu za zelah 19.63(%) ah a tlahniam a, World Bank Group leh NITI Aayog buatsaih Health Index ah state te (small state) zingah Mizoram chu pakhatna niin state lian te telna ah pawh pahnihna kan nih thu a sawi.

Ram mamawh em em electric power, inkalpawhna (transport) leh inbiakpawhna (communication) te ti hmasawn zel turin NEDP hnuaiah kum 2016–2019 chhunga hman turin cheng vbc 2,000 lai dah hran a ni, a ti a. December 16, 2017 ah Prime Minister of India, Shri Narendra Modi-an Tuirial Hydro Electric Project a hawng a. 210 MW Tuivai Hydro Electric Project thawk tan turin Mizoram sawrkar leh NEEPCO ten inremna thutlung (MOU) an ziak tawh a. Solar Power Policy of Mizoram 2017’ hnuaiah solar power plants thahnem tak dinin, Mizoram sawrkar chuan Solar Energy atan Cheng vbc 600.00 hu letter of intent a ziak bawk tih a sawi. Inkalpawhna kawng siam kawngah State Roads projects, PMGSY, NEC, NABARD leh NEDP kaltlangin hmalak mek zel a ni a. Lei hlui (temporary bridges) thlakna atan Lei thar (permanent bridge) 21 cheng vbc 137.97 senna tur CRF, NABARD leh MORT&H atanga sum hmuhin siam mek a ni a. MPWD Vision 2030 hmathlir ang chuan kum 2030 ral hma in Mizoram PWD enkawl lei hlui temporary bridges zawng zawng te lei tha permanent bridge a thlak vek tum a nih thu a sawi.

Mizoram mipuite himna chu Sawrkar ngaih pawimawh ber a ni tiin hemi kawnga Dan kengkawhtute, tlawmngai pawl, kohhran leh mipui vantlang te inpekna leh thawhrimna chu fakawm a tih thu Minister chuan a sawi a. Misual chhuina atan Crime and Criminal Tracking Network and Systems (CCTNS) Project din niin Police Station 20 ah CCTNS CAS (Core Application Software) systems bun fel a ni a. Lunglei High Powered Committee hmalaknain Lunglei khawpui chhunga venhimna hna leh Traffic Control System tih changtlun theih nan Cheng Vbc 1.45 sengin CCTV hmun pawimawh ah ted ah a ni dawn a. Kum 2017-2018 chhungin Mizoram Police CID (SB) te  chuan bungraw phal loh leh drugs  Cheng vbc 9.98 man hu an man thu a sawi a. NLCPR sumin Aizawl Central Jail leh Saitual Sub-Jail ah te hmeichhe tanna bik jail sak a ni a, hawn mai theih tura peih mek a ni a. HPC (D) te nen inremna siam niin CTI Sesawng ah April ni 13, 2018 khan an ralthuam an dah thu khuallian chuan a tarlang bawk.

Mizoram sawrkar Flagship Programme New Economic Development Policy (NEDP) chu thar chhuah tihpun, mipui mamawh siamsak, mipui sum dinhmun chawikan leh sumdawnna boruak tha siam nan a ruahman a nih thu Minister chuan kalkhawmte a hrilh a. NLUP/NEDP convergence thawh khatna ah tanpuina mi 1,500 in an dawng a, a thawh hnihna ah mi 16,400 hnenah pek an ni a. Agriculture link roads Kms 402.518 a sei siamna tur leh kawng awm sa  Kms 487 a thui chu kum tluan a hman theih tura tih changtlun tum a ni a. Horticulture Department hmalakna in Lunglei ah ‘Centre of Excellence for Fruits’ March ni 7, 2018 khan hawn a ni a, he Centre hi thlai chinna hmanrua tha zawka thar chhuah tha leh tam zawk  thar tura lo neitute tan inzirna hmun pawimawh tak ni tura ruahman a ni a. Dragon fruit chinna atan ram hectare 770 a zau buatsaih mek niin, state dang atanga lak luh ti tlem turin off-season a zikhlum leh tomato chinna tur ram zau tak buatsaih mek a nih thu Minister chuan mipui kalkhawmte a hrilh a ni.

 

AH&Vety Department hnuaiah kum 2017-2018 chhungin NLUP-NEDP convergence scheme atangin Cheng vbc 39.93 lai chhungkaw 13,242 hnenah pek chhuah an ni a. Fishery Department pawhin Blue Revolution leh RKVY schemes atangin sangha chi tihkeuna (Carp Hatcheries) Aizawl, Mamit, Champhai, Kolasib leh Serchhip districts ah a bun a. Sericulture Department chuan Integrated Sericulture Development Project, NERTPS hnuaiah project Cheng nuai 3,249.20 hmanna tur Hnahthial leh Lunglei block-ah duan mek a ni a, hei hian chhungkaw 600 lai a huam dawn thu a sawi a. Sumdawnna ti changtlung turin Commerce & Industries Department kaltlangin hmasawnna ruhrel hmun tam takah buatsaih a ni a. Hemi hnuaia hmalakna lansgar zualte Kaladan Multi Modal Transit Transport Project, Trade Facilitation Centre, Tlabung leh Border Haat sak tur hmalaknate Minister chuan a tarlang.

Sawrkarin zirna a ngaih pawimawh thu sawiin Minister chuan NEDP kaltlangin zirna hmun leh hmanrua tih changtlunna atan kum 2017-2018 khan Cheng vbc 10.55 School Education Department ah dah a nih thu te, NABARD kaltlanga Cheng nuai 2,553.58 dah a nih thu te, SSA kaltlanga Special Centres leh Hostel sak thu te leh National Institute of Open Schooling (NIOS) hnuaia hmalaknate a tarlang a. Thiamna tipung  zel turin sawkarin hma la mek zelin NEDP kaltlangin Science and Technology Department chuan Innovation Facility Centre Aizawlah an din dawn bakah NEDP leh NEC kaltlangin Lunglei Science Centre & Digital Planetarium, Zohnuai, Lunglei sak hna kalpui mek a nih thu kalkhawmte a hrilh a.

Retheihna um bo tura Central government hnuaia Rural development schemes hrang hrang - MGNREGS, NRLM, PMKSY-WDC, BADP, PMAY-G, NLCPR te chu Mizoram Sawrkarin chak taka kalpui in Hmarchhak state zinga ti tha ber nihna Outstanding Performance Award, 2017 dawng hial thei dinhmuna kana wm thu a sawi a. Food, Civil Supplies & Consumer Affairs Department hnuaiah buhfai Metric Ton 5479.83 thla tin a sem niin furpui laia laia kal harsatna Supply Centres thlanchhuah 47 ah October 2018 thleng tla tur buhfai chhek khawl a ni a, tun dinhmunah Mizoram pumah hian ration card 2,66,727 awmin mi 12,56,124 in ration buhfai an lak thin thu Food, Civil Supplies & Consumer Affairs Minister chuan a tarlang.

Mipui vantlang hriselna sawrkarin a ngaih pawimawh thu sawiin Minister chuan District hospitals leh health centres NLCPR, NEC leh NEDP sum hmanga thuam that an nih thu teState Referral hospital, Falkawn chei that a nih thu te, Civil Hospital Lunglei staff quarters sakna tura ruahmana siam a nih thu te a tarlang a. Hemi kawnga hlawhtlinna ropui tak Mizoram Institute of Medical Education & Research (MIMER) chu  August 7, 2018 ah hawn niin, NEET UG exams a tling Non Resident Indian (NRI) te tan 15% seats, Central Pool 15%, State Quota 70% ruahman a niin tun academic session atan July, 2018 khan admission tan a nih thu Minister hian a sawi bawk.

Khelmual tha leh infiamna hmanruaa hmasawnna chuan nasa takin rah tha thlen mek in kum 2017-18 chhungin sport discipline hrang hrangah Mizo infiammiten international level ah medal 49, national level ah medal 160, leh regional level ah medal 71 an la a. Mizorama indoor hall lian ber Multipurpose Indoor Hall, Sazaikawn, Lunglei ah February 2018 khan hawn a ni bawk a ni.

Tourism Department Minister chuan Mizoram Tourism ti hmasawn tura sawrkar hmalakna hrang hrang - 18 holes Golf Course Thenzawl, Adventure Park Reiek, Ropeway Durtlang leh Chaltlang inkalpawh theihnate leh Skywalk, Sakawrhmuituai Tlang te a tarlang a. Tourist facilities awmsa te thuam that mek an nih bakah Zokhaw lamah Rural Tourism tih lar nan State Sorkar hmalakna NEDP hnuaiah Rural Homestay kalpui mek niin Champhai District a khaw 6 (paruk) leh Mamit District a khaw 4 (pali) ah te he project hi chak taka kalpui mek a nih thu a sawi.

Sawrkarin khualzin mite lirtheia him taka veivah tir a ngaih pawimawh thu sawiin Transport Minister chuan hemi kawnga hmalakna Automated Vehicle Inspection & Certification Centre, Hlimena sak tur te, Aizawl Traffic Jam Free Project-te, Public parking cheibawl hna te leh Chatlanga sak mek Transport Complex te a tarlang a. Aizawl khawpuiah Two Wheeler Taxi hlawhtling taka kalpui mek niin traffic lamah harsat na a thlen tam loh na atan State Transport Authority chuan permit 500 aia tam pek a remtih loh thu a sawi a. MST Bus service chu route hrang hrang 16 ah tlan tir mek niin Mizoram mipuite hlut a hlawh hle a ni, a ti bawk.

 “Vawiinah hian, Sawrkar hnathawk te, tlawmngai pawl te, Kohhranho te, mipui leh chanchinthar thehdarhtute hnenah tihtakzetin lawmthu ka sawi a. India ram zalenna ni ah hian ram mipuite hian ram tan enge ka tih theih tih ngaihtuahin hmalam huntha nei turin theihtawp I chhuah zel ang u,” tiin Minister Pu John Rotluangliana chuan Independence Day lawm tura mipui leh official kalkhawmte chu a fuih bawk.

Vawiin Independence Day parade-a contingent 24 zingah hian Armed Contingent pali, Unarmed Contingent paruk, School Contingent sawmpahnih leh Band Parties pahnih te an tel a, Pu HC Vakhu, Inspector  chu Parade Commander  niin SI C. Lalthangliana chu 2nd Parade Commander a ni. Unarmed contingent zingah Scouts and Guides, Southern Flower School chu pathumna niin Scouts and Guides Sacred Heart School chu pahnihna an ni a, NCC Airwing, BHSS chu pakhatna an ni. School Contingent zingah Faith Hill School of Arts, Lunglawn chu pathumna niin Serkawn Sikulpui chu pahnihna an ni a, Christian Education Centre, Chanmari chu pakhatna an ni.

Kumin Independence Day pual hian Badminton, basketball, snooker & billiards, tennis, carrom board, table tennis, karate leh football-ah te inelna buaitsaih a ni a. Heng intihsiakna a tithate hnenah khuallian chuan lawmpuina a hlan bawk a ni.

Thuamluaia Mual-a Independence Day lawmna inkhawm neih a nih zawh hian khuallian Pu John Rotluangliana hovin mi sawm bikte tan Lunglei Government College (LGC) Multipurpose Hall-ah DC’s At Home function hman zui a ni bawk.


Attachment

  • Loading attachment...