India ramin zalenna a hmuh champha phak vawi 72-na chu ram chhung hmun dangte rualin vawiin khan Lawngtlaiah ropui takin hman a ni a. A lawmna pui ber AOC Veng Playground-ah chuan AH & Vety, etc. Minister Pu C. Ngunlianchunga chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Chawhma dar 10:30-ah AOC Veng Playground-ah Khuallianin hnam puanzar pawt pharhin, hnam puanzar chibai buktu parade contingent 10 te chibai buk a chhang let nghal bawk.

Khuallian Pu C. Ngunlianchunga chuan India ramin ram dang mite awp behna atanga zalenna a hmuh theih nana hma latu mi huai kal tate zahna chibai bukin, mipui pung khawmte chu zalenna chibai a buk bawk a. Kum 2022 hmaa New India hmathlir hlawh chhuak thei turin ram hma sawnna leh mipui hamthatna hna thawh hrang hrangah sawrkar thawhpui zel turin kal khawmte chu a chah a ni.

Khuallian chuan Mizoram leh Lawngtlai District hma sawnna hrang hrang a tar lang a. Mizoram sawrkarin kum 2011-a NLUP a kalpui atangin tlangram lo neih 31.37%-a tla hniamin, state economy pawh 8%-in a than phah tih a sawi a. New Economic Development Policy hnuaiah kum 2016 atanga 2019 chhung atan 'tang puihna' tur sum Rs vaibelchhe 2,000 ruahman niin, hemi hnuaiah hian hmasawnna hna hrang hrang thawh mek a ni, a ti a. Sawrkarin kawng tinrenga hma sawnna hna a thawh mek zingah medical college thar MIMER kumin August ni 7-a hawn lo ni ta chu Mizoram chanchina bung thar kaina pawimawh tak a ni, a ti.

Lawngtlai District-a sawrkar hma lakna pawimawh tak tak zingah Lawngtlaia khelmual pui ber CYLA Playground phullem phah hna thawh a nih thu leh hawn theiha peih fel a nih tawh thu a sawi a. AH & Vety Department hnuaiah Lawngtlai District-a Bungtlang 'S'-ah Dispensary building sak zawh tawh niin, staff quarters pathum pawh chei that nghal a nih thu leh Hmawngbu, Vathuampui, Karlui leh Vawmbukah te Rural Animal Health Centre (RAHC) building sak zawh tawh niin, thawktu pawh dah nghal an nih thu a sawi a. Lawngtlaiah village farmer shed, Sangauah veterinary aid centre leh Lawngtlai College Veng leh Bungtlang 'S'-ah animal check gate te sak niin, function-tir nghal a ni a, Mampui Farm-ah vawkpui 75 vulh theihna hmun din niin, bawng note 30 vulh mek a nih bakah, ar awp keunaah vawi 2 awp keutir tawh a ni, a ti.

Pu C. Ngunlianchunga chuan tun hnaiah Horticulture Department hnuai atangin Bualpui NG leh Lungzarhtum khuaa zikhlum tharte vawn thatna tur pack house sak a nih thu te, Diltlang 'S' leh Sangau khuaa Circle Horticulture office cum quarters sak zawh leh hawn a nih tawh thu te a sawi a. District chhunga khaw tina eng pek luhna tur thawh zawh tep a nih tawh thu leh Soubhagya scheme hnuaia in tina eng pekna tur pawh kalpui mek a nih thu a sawi a. He'ng bakah hian department dang dang kal tlanga sawrkarin kut hna thawktute, zirlaite, thalaite leh mipuite hma sawnna atana hna a thawh hrang hrangte a tar lang bawk.

LADC hnuaia hma lakna hrang hrang zingah Rural Development Department atangin CEM Rural Housing Scheme hnuaiah chhungkaw 125 hnenah in sak tanpuina Rs 50,000/- theuh leh chhungkaw 130 hnenah in sak tanpuina rangva bundle 4 theuh pek an nih thu te, NLCPR atangin khaw hrang hrangah primary school building 10 leh middle school building 7 sak a nih thu te, Lai House annexe building leh Lai students' hostel sak a nih thu te, PHE atangin tuizem sem a nih thu te pawh a sawi. 

Hemi hnu hian ceremonial parade lawmman sem nghal a ni a. Lairam High School contingent chu pakhatna niin, Govt Region High School contigent chu pahnihna an ni a. Mizoram Police armed contingent leh Govt Model English School pipe band te chu special participation prize leh, parade contingent dang zawng chu participation prize hlan ni bawkin, parade commander leh judge-te pawh lawmman siamsak an ni bawk.

He'ng bakah hian Independence Day Football leh Badminton Tournament lawmman sem nghal a ni a. Football-ah hian Lawngtlai Vengpui Football Club chu champion niin, Lawngtlai Council Veng Football Club chu pahnihna an ni. Badminton category hrang hrang paruk zingah men's open singles-ah Kapthanga a champion a. Men's open doubles-ah Lalhmangaihzuala leh Johnny L. Zosangliana te inkawp champion-in, women's doubles-ah Lalrambeiseii leh Lallawmchhungi te inkawp an champion bawk.

Vawiin Lawngtlaia Independence Day lawmnaah hian Lawngtlai DC Pu N. Chakhai MCS, LADC CEM Pu T. Zakunga, LADC Chairman Pu V. Zirsanga leh Lawngtlai SP Pu Amit Goel IPS te bakah, LADC-a member te, state leh district council-a officer leh staff te, political party leh tlawmngai pawl ai awh te, khawtlanga mi challang tak tak leh thu thar theh darhtu te, sikul naupang leh mipui thahnem tak an tel a. Muala hun hman zawh hian LADC Hall-ah LADC CEM buatsaih VIP At Home Tea Party hlimawm tak hman chhunzawm a ni.

Kumin Independence Day pual hian Lawngtlai District Independence Day Celebration Committee chuan Lairam Motherless Home leh District Jail-ah te tanpuina Rs 2,000/- ve ve an hlan a ni.

Attachment

  • Loading attachment...