4636/2025-2026
Lunglei, 2026 Ramtuk thla ni 27: Vawiin khan Mizoram Agricultural Marketing Board (MAMB) huaihawtin Lunglei DC Conference Hall-ah Mizoram chhim lam district pali – Lunglei, Siaha, Lawngtlai leh Hnahthial-a District Agricultural Marketing Committee (DAMC) member-te, Secondary Collection Centre (SSC) puipate leh Society hruaitute nena Thlai Thar Hralhna Chungchanga Inrawn Khawmna, "Consultative Meeting on Thlai Thar Market" buatsaih a ni a. Mizorama sawhthing hralhna man (rate) reserved price hman mek chu san hret an remti tlang.
Mizoram sawrkara Agriculture & Farmers Welfare Department Secretary & MAMB Member Secretary Pi Ramdinliani chuan he inrawn khawmna hi hmanpuiin, hawnna thu a sawi a. Mizoram sawrkar ruahmanna, Bana Kaih (Handholding) Scheme hnuaiah nikum aṭangin thlai thar chi li – sawhthing, aieng, hmarchate leh hmunphiah te lak khawm leh hralh sawrkarin a buaipui ṭan tih sawiin, sawhthing hralh chungchangah chawh lawk sa avanga hralh hmanhmawh avangin leh a leitu turte'n a man an dawn hniam nasat avangin duh aia tlawmin hralh a ni tih a sawi a. Kuminah sawhthing chingtute'n man to zawka sawhthing an hralh theih nan MAMB-in ngaihtuahna sengin, support price hmu tura sawhthing hralh theihna hniam ber (reserved price) a siam tih sawiin, a leitute'n an duh ang anga a man an tihhniam loh nan phai lama Mandi hrang hrang rate te nen en milin reserved price chu bithliah a nih thu a sawi a. Kuminah sawhthing leitute khuahkhirh nan reserved price siam bakah, a leitute'n a man 50% security deposit an pek lawk a ngaih bakah, a ip (mesh bag) pawh anmahni an intum a ngaih thu a sawi a. Nikumah ₹30 aia tova hralh a awm loh laiin, kumin February ni 18-ah Tipaah kg-ah ₹30-in hralh a ni tawh tih sawiin, nikum aiin buyer lian pawh an rawn lang nasa tih a sawi a. Kuminah sawrkar, MAMB, DAMC, SCC, Society leh sawhthing chingtute ṭan hona avangin hmasawnna a awm tih sawiin, SCC leh sawhthing chingtute'n MAMB thu leh hla an ngaihchan avangin lawmawm a tih thu a sawi a. Sawhthing hralhnaah sawrkar a inrawlh tawh loh hunah pawh market ṭha leh inthlun khawmna (society) ṭha a awm reng theih nan kalphung ṭha tak duan tum a nih thu sawiin, hei hi zavaia ṭhat tlanna tur a nih avangin theih tawp chhuah tlang turin a chah a. Sawhthing chingtute hmakhaw ngaiin sawrkarin ruahmanna a siam zel dawn tih sawiin, sawhthing chingtute chu sawrkarin support price a pek dawn tho avangin nakkum rate leh kar leh rate tichhe thei khawpa hmanhmawh lo tur leh mangang lo turin a chah.
He inrawn khawmna hi Lunglei District Bawrhsap Pi Navneet Mann chuan a kaihruai a. MAMB Deputy Managing Director Dr David Fangzauva chuan Secondary Collection Centre (SCC) kalpui dan tur leh enkawl dan tur, "Standard Operating Procedures (SOP) for SCC" a sawi fiah.
He hunah hian Siaha Bawrhsap Pu VL Hruaizela Khiangte, Hnahthial Bawrhsap Pi K. Vanlalruati, MAMB Member Pi Laldikkimi leh A&FW Deputy Secretary Pi Lalremruati te bakah, district pali aṭanga DAMC member-te, SCC puipate leh Society ai awhte an tel a. Sawhthing rate (reserved price) siam dan leh thlai thar lei leh hralh kaihhnawih thil pawimawh hrang hrang khunkhan taka sawi ho a ni a. Sawhthing rate reserved price hman mek chu san hret an remti tlang a. Sawhthing hralh chhuah tur fai leh thianghlim zawk a awm theih nana ṭan lakna tur hrang hrang sawi ho a ni bawk a. Lunglei District Agriculture Officer & DAMC Member Secretary Dr Samuel Lalliansanga'n lawm thu sawiin hun a khar.
Attachment
- Loading attachment...
