2033/2025-2026

Lunglei, 2025 Khuangchawi thla ni 31: Vawiin khan India ram inpumkhatna atana hma latu thawh hlawk tak, Sardar Vallabhbhai Patel pian champha kum 150-na puala Mera Yuva Bharat (MY Bharat) hnuaia India ram inpumkhatna atana beihpui thlak tur, "Sardar @150 Unity Campaign" hnuaia hma lakna tur hrang hrang chu Lunglei DC Conference Hall-ah thu thar theh darhtute hmaah Lunglei District Additional Deputy Commissioner Pi Zoramdini chuan a puang.

Addl DC Pi Zoramdini chuan inpumkhatna leh thawh hona ṭha tel lo chuan hmasawnna tluantling a awm thei lo tih sawiin, Sardar Vallabhbhai Patel-a hnung zuia sawrkarin ram inpumkhatna atana ruahmanna a siam chu a hlawhtlin theih nan sawrkar hna thawk, tlawmngai pawl, kohhran leh mipuite thawhpuina a ngen a. Hma lakna puanzar leh theh darh kawngah thu thar theh darhtute ṭawiawmna a ngen bawk.

He hunah hian MY Bharat State Director Pi Mercy Sellate bakah, DC Office, Sports & Youth Services leh I&PR-a official-te leh thu thar theh darhtu eng emaw zat an tel a. MY Bharat hnuaia hma lakna tur ruahmanna hrang hrang thlir ho va, sawi ho a ni.

Sardar @150 Unity Campaign hi ṭhalaitea ram hmangaihna, inunauna leh inpumkhatna thinlung tuh tura hma lakna niin, Union Minister for Youth Affairs & Sports Dr Mansukh Mandaviya chuan October ni 6, 2025 khan India ram pum huapa Sardar @150 Digital Phase hma lakna tur chu a lo hawng tawh a. Digital Phase-ah hian intihsiakna hrang hrang - Social Media Reel Contest, Essay Writing Competition leh Sardar @150 Young Leaders Programme Quiz te buatsaih niin, MY Bharat Portal (https://mybharat.gov.in/pages/unity_march), aṭanga tel theih tura ruahman a ni.

Sardar @150 programme hnuaiah hian Podcast Series - Ek Tha Sardar chu MY Bharat Portal aṭanga pek chhuah tura ruahman a ni bawk a. A remchan dan angin Sardar Vallabhbhai Patel chanchin leh India ram inpumkhatna atana a hma laknate chu vantlang hmun remchangah pho chhuah leh inzirtir ṭhin a ni bawk ang.

He hma laknaah hian inpumkhatna kawng zawh, District Level Unity March (Pad Yatra) chu October 31 - November 15, 2025 inkar chhungin ṭhalai rual, school leh college zirlaite bakah, khawtlanga mi challang leh chhuanvawrte nen buatsaih tura ruahman a ni a. Sardar @150 pual hian faina hnatlang (cleanliness drive), thing phun (plantation), inpumkhatna thutiam (unity pledge), hnam ziarang pho chhuahna (cultural performance) leh inzirtirna (awareness campaign) te ruahhman a ni bawk ang.

Indian Constitution Day, November ni 26, 2025-ah Sardar Vallabhbhai Patel pianna hmun Karamsad (Gujarat) aṭangin Statue of Unity, Kevadia, Gujarat thleng (Kilometre 152) inpumkhatna kawng zawh (National Level Unity March/Pad Yatra) buatsaih tura ruahman a ni bawk a. He hunah hian India ram district tin aṭangin mi pahnih tel tura ruahman a ni.