2034/2025-2026

Dated Hnahthial, the 31st October, 2025: Indian ram inpumkhatna atana pawimawh berte zinga mi, Sardar Vallabhai Patel, Iron Man on India ti a koh piancham vawi 150-na puala buatsaih Sardar@150 Programme chungchang sawiin vawiin khan DC Meeting Hall-ah SDO(Sadar), Pi Esther Leihang chuan thuthar lakhawmtute leh Khawtlang hruaitute Press Conference a neihpui a. Sadar Vallabhbhai Patel-a chanchin leh he hun hman a pawimawhna te sawifiahin kalkhawmte chu mipuite, a bikin thalaite hnenah he programme awmzia leh a huam chin te lo hrilh darh turin a chah a ni. Press Conference hi DIPRO, Pu F. Lalrinfela chuan kaihruaiin Hnahthial District chuan he programme denchhen hian inpumkhatna tha zawk an neih theih ngei a beisei thu a sawi.

SDO (Sadar) chuan Sadar Vallabhai Patel-a chu India ramin zalenna a sual chhuah tirh a lalram te reuh te te 565-te huikhawmtu, India ram pumkhata siamtu a nih avangin amah chawimawi nan leh zahna lantir nan he Sadar@150 programme pawh hi buatsaih a nih thu a sawi a. Sadar Vallabhai Patel kha India ram inpumkhatna pawimawhzia hrechiangtu a nih ang bawkin kan Prime Minister, Pu Narendra Modi chuan India ram inpumkhatna tih ngeh nan leh hmasawn nan Viksit Bharat @2047 hnuaiah hma a lak mek thu tarlangin he Sadar@150 pawh chumi hnuaiah dah tel a nih thu a sawi a. Hnahthial District-a kalpui dan tur chu chipchiar zawkin November ni 6-ah rel tura ruahmanna siam a nih thu a sawi bawk.

Sardar@150 hi October ni 6 khan India ram pum huapa tlangzarh niin hemi pual hian intihsiakna hrang hrang - Social Media Reel Contest, Essay Writing Competition leh Sadar@150 Young Leaders Programme Quiz te buatsaih a ni a. MY Bharat Portal (mybharat.gov.in/pages/unity_march) atangin he intihsiaknaah hian tel theih tura buatsaih a ni.

Sardar@150 programme in a ken tel programme dang te chu Podcast Series -Ek Tha Sardar a ni a, hei hi MY Bharat Portal atanga pek chhuah tur a ni. A remchan dan anga Sardar Vallabhai Patel chanchin leh India ram inpumkhatna atana a hmalaknate hi vantlang hmun remchangah inzirtirna neiin tarlan a ni bawk ang. District Level-ah Unity March (Pad Yatra) hi thalai rual, School leh College zirlaite bakah khawtlang mi chhuanvawr, mi challang te, mi larte tel theih tura ruahman a ni ang a. Sardar@150 programme denchhen in a theih ang anga Cleanliness Drive, Plantation, Unity Pledge, Cultural performance, Awareness campaign te buatsaih tura beisei a ni bawk.

Indian Constitution Day, 26th November 2025 hian Sardar Vallabhai Patel pianna hmun, Karamsad (Gujarat) atangin Statue of Unity, Kevadia, Gujarat thleng (Kilometers 152) lnpumkhatna kawngzawh (National Level Unity March/ Pad Yatra) neih tura ruahman a ni a, District tin atangin mi pahnih tel tura ruahman a ni.

Kan ram Prime Minister, Pu Narendra Modi-a Vocal for Local - mahni tualchhung kut chhuak leh thar chhuah ngaihhlut a, hmang tangkai tura hmalakna leh Atmanirbar Bharat (Self-Reliant India) - intodelh nana mahni tharchhuah leh kut chhuak te ngaina a hmang tangkai tura hmalakna te kal pui zelna tura tih a ni.