No.4934/2020-2021

Nimin chawhnu ah MYC Coaching Centre thar, Baichi Building, Chanmari Lunglei a hawn hnuah vawiin khan Mizoram Youth Commission Chairman Dr Vanlaltanpuia chuan MYC hmalakna hrang hrang leh hmachhawpte sawipui turin Lunglei District media mi te Lunglei Press Club ah a kawm.

Press Meet ah hian MYC member pathum – Prof J. Zorema, Pu Lalramchhuana leh Dr C. Lalsangzuala te leh MYC Secretary Pu Donny Lalruatsanga, Under Secretary Pu H. Lalnunzuala te telin Lunglei District MJA te an President Pu H.Lalthansanga hovin an tel a ni.

Mizoram Youth Commission Chairman Dr. Vanlaltanpuia chuan Mizo thalaite hmasawnna turin MYC chuan theihtawp a chhuah mek zel a ni tiin MYC hmalakna chu huam zua zawk leh thalai tam zawkten an hman tangkai theih tura ruahmanna siam mek zel a ni, a ti a. Central sawrkar leh State sawrkar hnuaia hna hrang hrang atana coaching buatsaih piah lamah Banking, sipai, NEET/ JEE coaching , sports, fashion, music etc lamah te inzirtirna leh inkaihhruaina mumal tak leh ngawrh taka kalpui tum a nih thu a sawi a.

India rama IAS Coaching hlun leh tha berte zing ami ALS Coaching Academy, New Delhi nen tangkawpin Aizawl, Lunglei, Siaha leh Kolasib-ah te IAS Offline Coaching Class kalpui turin ruahmanna kalpui mek a ni a. ALS Coaching Academy, New Delhi faculty ten a hmunah an rawn zirtir dawn a ni. Lunglei Centre-ah pawh 2020 Prelims Exam zawh veleh a Class neih tan tum a ni a, chumi atana a kal tur te thlanna pawh neih thuai a ni ang. Tin, Central Service atana inziah tlin tum, thalai lehkhathiam mi 20 thlanchhuah bikte chu Delhi hmuna Top Ranking Coaching Centre-ah te zir turin MYC-in Full Sponsorship pein an awmna senso leh an Course Fee te tum sak vek dawn a ni.

Hemi bakah hian State service hrang hrang – MCS, MPS, MIS, MF&AS etc atan coaching kalpui ani bawk anga, SSC, Banking, NEET/JEE coaching-te buatsaih chhunzawm zel a ni ang.

Mizoram Youth Commission hmalakna thar dang "Job-Portal" chungchang pawh sawilangin he "Job-Portal" hi hna zawng te leh thawktu mamawhtute intawh khawmna niin Mobile application leh Website ruahman mek niin tun thla chhung hian tlangzarh tum anih thu MYC Chairman chuan kalkhawmte a hrilh bawk. He portal kaltlang hian zirlai, thalai, inhlawhfakna mamawh te harsatna tam tak a sut kian beisei a ni, a ti.

MYC Convergence Plan 2020 chungchang pawh sawiin MYC Chairman chuan he ruahmanna kaltlang hian Mizoram Youth Commission chuan State pawna hnathawk eizawnna chan te tan an in report-na tur Google Form buatsaihin June ni 2, 2020 atang khan in report na hun a hawng a, mi 2700 dawn rawn in report-in heta tang hian Department hrang hranga Skill Training awmte nen an thawhho theih dan tur "Convergence Plan" a buatsaih chu Sawrkar-ah thehluh a nih thu a tarlang bawk.

Hemi bakah hian MYC hmalakna hrang hrang - SAVUN ZIAL (Lecture Series Programme), MYC Cash Incentive Award, MYC Young Achiever Award, Career Awareness-te kalpui chhunzawm zel a ni dawn a ni.

Mizoram Youth Commission Chairman Dr Vanlaltanpuia chuan media mi te chu MYC hmalakna kal zelah kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a ni.

Vawiin vek khan MYC Chairman hovin DRDA Lunglei Conference Hall-ah tlawmngai pawl leh  zirlai pawl te nen inkawmhona hun hmangin MYC hmalaknate an sawiho a, thalaite hmasawn zelna tura hmalak tul te sawihovin inrawnkhawmna an nei a ni. 

Attachment

  • Loading attachment...