No.4933/2020-2021

Dated Serchhip, the 10th September, 2020: Vawiin chawhnu hian Serchhip Bawrhsap Pu Kumar Abhishek, IAS chuan Serchhip Hospital qround floor-a bun thar Covid19 sample enna thar TrueNat Laboratory a hawng a, sample pakua (9) endik zui nghal a ni.

A hawnna hun tawiteah Pu Kumar Abhishek chuan, kan district in kan mamawh em em, Covid19 dona kawnga hmasawnna nasa tak min thlen theitu tur khawl hman theiha a awm ta chu lawmawm a tih thu a sawi a, hmasawnna lian tak a ni, a ti. ZMC a sample inthawn hian hun a duh rei a, sample phurh thlaknaah sum leh pai sen a tul bawk a, chung thilte chu he khawl vang hian a lo nep deuh thei dawn a. Tin, hmanhmawha contact tracing tih leh sample test zung zung tul hunah pawh a tangkai hle dawn a ni, a ti.

Bawrhsap hnenah hian thawktu tenTruenat khawl hnathawh dan leh laboratory kalpui dan tur tlangpui an hrilhfiah a, RNA extractor pahnih awmin tum khatah Sample pahnih endik theih a nih thu leh result hre turin darkar khat leh a chanve vel hun a mamawh thute, nikhatah sample 16 vel en theih an in beisei thu te an lo hrilh a ni. Serchhip TrueNat enkawltu tur bik trained Technician hi pahnih an awm mek a ni.

A hawnna neih zawh hian Positive Contact tracing atanga sample lak thenkhat leh Quarantine Centre a awm mi pakua te sample endik zui a ni a, he thu buatsaih lai hian result kan hre hman ta lo a ni.

Vawiina TrueNat khawl thar hawnnaah hian Dr. Laldawngliana Sailo, CMO, Dr. ZD Lalmuanawma, DMS, Dr. Lalhlunpuii, SMO , Dr. K. Lallawmzuala, i/c Medical Officer TrueNat Machine bakah Medical Officer leh thawktu dangte leh media mite an tel a ni.