No.4932/2020-2021

Women & Child Development Department chuan vawiin khan Social Welfare Minister Dr. K. Beichhua Office Chamber-ah Mizoram puma Health Sub-Centre zawng zawnga hman atan, Blood Pressure (BP) enna khawl a hlan.

BP enna khawl hi Pradhan Mantri Matru Vandana Yojana (PMMVY) kaltlanga hlan a ni a, Health Department aiawhin RCH State Programme Officer, Dr. Lily Chhakchhuak leh MCH Nodal Officer, Dr. Lalthanpuii ten thilpek hi an dawng a ni.

Dr. Beichhua chuan naute leh nu naupaite enkawl kawngah Women & Child Development Department leh Health & Family Welfare Department-te thawhhona tha leh chak zawk an neih zel theihna atana thilpek hi hlan an ni tih sawiin, Health Worker, ASHA leh Anganwadi Worker ten thawhhona tha leh an neih chhoh zel chuan tun aia hlawhtling zawkin PMMVY pawh hi kalpui theih a beisei thu a sawi.

Women & Child Development Department Director Vanlalpianpuii pawhin thuchah sawiin, Health Department te nena thawhhona tha an nei thei zel chu lawmawm a tih thu sawiin, Department pahnihte te chu in lâwm ang an nih thu a sawi. BP enna khawl chu Mizoram Health Sub-Centre zawng zawngah nu naupai ten a thlawna BP an en theihna atana Health Department hnena hlan an ni tih a tarlang bawk. Health Department aiawhin Dr Lily Chhakchhuak in lawmthu sawiin, Health Department pawh anmahni ngawr ngawra kal thei an nih loh thu leh Department hrang hrangte nena thawhho ngai an ni, a ti a. Women & Child Department te thilpek chu an mamawh tak a nih thu leh thawhhona tha neih chhoh zel a beisei thu a sawi.

Women & Child Development aiawhin Deputy Director (ICDS), Zoramthangi Chhangte pawhin lawmthu sawiin, PMMVY an kalpuinaah Health Department ten an thawhpuina avangin lawmthu a sawi a, he project kalpui that lamah India ram pumah panga-na an nih thu leh India hmarchhakah a titha ber an nih thu a tarlang a, District Wise-in Serchhip District chu India ram district zawng zawngah PMMVY kalpui tha ber an nih thu a tarlang bawk a ni.

PMMVY hi nu naupai leh nau pawm te tana hamthatna Sorkar Laipuiin a duan a ni a, nu in nau a pawm chhungin a lo inenkawlna tur senso Rs. 5000 a thlawna dawn theih a ni a, mahni chenna veng Anganwadi Centre theuhah inziahluh tur niin, vawiin thlengin Mizoram pumah he hamthatna dawng tawh mi 19,784 an awm mek a ni.