1521/2024-2025

2024 Thlazing ni 9: Vawiin chawhma khan Government Mount Hermon Middle School, Ramthar Veng, Lungleiah rulhut hlo pek beihpui thlak thawh hnihna, National Deworming Day (NDD) 2024 August Round hman a ni a. Lunglei District Additional Deputy Commissioner Pu James Mialung chuan Khuallian nia hun hmanpuiin, sikul naupang thlan chhuahte hnenah rulhut hlo Tab. Albendazole a eitir a ni.

National Deworming Day 2024 hmanna Lunglei District Education Office-a Hindi Propagation Officer Pu Prakash Subha kaihhruaiah hian Pu James Mialung chuan National Deworming Day chu India ram pumah hman a nih thu leh, a tum ber chu naupang kum 1 aṭanga kum 19 inkarte rulhut laka ven a nih thu a sawi a. Ram hmasawn zelah hriselna kawnga hma laknate ngaih pawimawh deuh deuh a nih thu sawiin, kan hriselna hi kan thunun a ngai a, rulhut pai lo turin tih theih awlsam tak - kut sil fai ṭhat, thlai leh thei ei tur sil fai ṭhat, tui thianghlim chauh in, ek in ṭha leh thianghlim taka inthiar, ei tur khuh ṭhat bakah, in leh a vel vawn fai te ṭha taka zawm a ṭul a ni, a ti a. Rulhut laka fihlim District ni turin rulhut hlo ei ṭheuh turin naupangte chu chahin, rulhut laka fihlim turin Health & Family Welfare Department-ah chauh innghat lo va, department hrang hrangte leh NGO-te thawh hona nena hma lak a pawimawh thu a sawi.

Lunglei District Deputy Chief Medical Officer Dr Lalrinthangi chuan mihring tana rulhut ṭhat lohzia leh rulhut hlo ei a pawimawhzia a sawinaah rulhut paite chu an hrisel theih loh thu leh kan ran vulh leh thlai leh thei ei aṭang te'n rulhut pai theih a nih avangin thil ei dawnin kut fai taka sil a pawimawh thu a sawi a. Sa leh thlai te fai taka sil ṭhin a pawimawh thu te, hmun bawlhlawhah ke lawnga kal loh tur a nih thu leh in leh a vel vawn thianghlim a ngaih thu te a sawi bawk.

National Deworming Day-ah hian naupang kum 1-19 te hnenah rulhut hlo Tab. Albendazole pek ṭhin a ni a. Lunglei District chhunga Govt School, Govt Aided School, Anganwadi Centre, kum 1-5 Anganwadi Centre-a hming ziak lo, naupang kum 6-19 inkar sikul kal lo leh college zirlaite hnenah rulhut hlo hi pek vek tum niin, tun ṭuma rulhut hlo pek tur atan hian Lunglei leh Hnahthial District chhungah kum 1 leh kum 19 inkar target 60,532 an awm a. Vawiin khan district chhunga school, college leh anganwadi centre-ah te rulhut hlo hi inpek niin, sikul kal lote chu ASHA te'n an inah kal chilhin an pe bawk a. Target zinga tel si, vawiina pek hman lohte tan August ni 16 khian Mop Up buatsaih a ni leh dawn bawk a ni.