1522/2024-2025

2024 Thlazing ni 9: Vawiin chawhnu khan Lunglei District Task Force for Immunisation (DTFI) chu an Chairman, Lunglei District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm. Natna hrileng inkai chhawn theih laka naupang leh nu nau pai laite invenna damdawi (vaccine) pek kalpui ṭhin (routine immunisation) chungchang leh Lungsen Aspirational Block chhunga hma lak dan tur an sawi ho.

He hunah hian Lunglei District chhunga vaccine pek chungchanga hma lak tawhna report ngaihthlak niin, hmabak la awmte sawi ho a ni a. Routine immunisation kal tlangin vaccine hmanga ven theih natna chi hrang hrangah naupang kum 5 hnuai lam leh nu nau pai zawng zawngin a bi kima vaccine an lak vek theih nan hma lakna kalpui mek a nih thu tar lan a ni.

Kum 2024-2025 1st quarter (April, May & June) chhungin routine immunisation kal tlanga vaccine pek tur nu nau pai 2,626 leh naupang 2,657 target niin; Td2 & Booster (Pregnant Women) 656-ah 580, BCG-ah 664-ah 543, Hep B (Birth Dose)-ah 664-ah 449; Penta-1-ah naupang 664-ah 551; Penta-3-ah naupang 664-ah 602; Measles Rubella (MR) 1st Dose naupang 664-ah 522; Fully Immunised (kum 1 hnuai lam) naupang 664-ah 522; Completely Immunised (MR2)-ah naupang 664-ah 609 te hnenah vaccine hi pek a ni.

Lungsen Block chu Aspirational Block a nih angin hriselna kawngah ngawrh zawka hma lakna kalpui a nih thu tar lan a ni a. Lungsen Primary Health Centre (PHC) hnuaia Sub-Centre pasarih (7)-ah kum 2023-2024 chhungin naupang leh raipuarte hnenah vaccine 89% pek niin, kum 2024-2025 (April, May & June) chhungin vaccine 13% pek a ni tih tar lan a ni a. Lungsen Block hnuaia vaccine pek chungchanga harsatna hrang hrang awm ṭhinte tar lan ni bawkin, hma lakna chak zawk a awm theih nan line department hrang hrang bakah, YMA leh MHIP te chu theih tawp chhuaha thawhpui turin sawm an ni.