1523/2024-2025

Aizawl dated 9th August 2024: Pu K.Sapdanga, Home Minister, Govt. of Mizoram leh Pu Atul Bora, Minister, Border Protection and Development, Govt. of Assam telna, 'Goodwill Mission' kaltlang a Mizoram - Assam Inter-State Border Meeting chu vawiin chawhnu khan State Guest House, Aizawlah neih a ni a. He thutkhawmna ah hian Land Revenue & Settlement Minister Pu B. Lalchhanzova, Home Secretary Pu Vanlalmawia, Addl. Secretary Pu Joseph H. Lalramsanga leh Home department official-te an tel a. Assam Sawrkar aiawh hian Border Protection and Development Minister Pu Atul Bora hi Principal Secretary, Border Protection and Development Department Pu Gyanendra Dev Tripathi, IAS; Secretary Pi Prabhati Thaosen, IAS; Director Pi Subhalaxmi Deka, ACS leh mi pawimawh dangten an tawiawm bawk a ni.

Goodwill Mission hnuai a thutkhawmna neih zawh hian thutharlakhawmtute nen inkawm hona hun neiin thuchhuah intawm, Joint Statement a hnuai ami ang hian an siam.

JOINT STATEMENT 

He thuchhuah intawm (joint statement) hi Mizoram leh Assam Sawrkar aiawh inbiakna,  August ni 9, 2024 a State Guest House, Aizawla neih kaltlanga siam niin, Pu K. Sapdanga, Home Minister, Mizoram leh Pu Atul Bora, Border Protection & Development Minister, Assam te'n   hming an ziah hnan a ni. 

1. August ni 9, 2024-a Mizoram Sawrkar leh Assam Sawrkar inkara 'Goodwill Mission' Aizawl, Mizorama neihah hian February ni 9, 2024 a Assam leh Mizoram Chief Minister te'n  State pahnih inkarah inhriatthiamna leh duhsakna nena ramri buaina chinfel a nih theih nan inpekna nghet tak nena hmalak thin ni se tia thu an dah chu nemngheh nawn leh a ni. 

2. State pahnihte chuan ramriah remna leh muanna vawn chhunzawm zel ni se, thil duhawm lo a thlen loh nan hmalak ni se an ti a. Ramri hnaih District thuneitu ve ve te'n a khat tawkin Joint Cultural and Sports Festival-te buatsaih thin se, hemi tur hian January ni 31, 2025 ral hma ngeia hmalak ni se an ti.

3. State pahnih aiawhte chuan thutkhawm hmasa lo neih tawh te atang a thuchhuah intawm siam tawhte tih hlawhtlin nan hmalak zel an tum a. Hmachhawp hrang hrang siam tawh te tih hlawhtlin nan Sawrkar Official-te bawhzui tur a tih a ni a. Chung hmalakna bawhzuina ennawnin thutkhawmna neih thin tur a tih a ni. Minister kaihhruai thutkhawmna hi March ni 31, 2025 hma in neih leh tur a tih a ni.

4. State pahnihte hian ram dang atanga kuhva ro tawlh chungchangah tumah ngaihnathiamna nei lova khauh taka hmalak chhunzawman rem an ti.

5. Assam leh Mizoram inrina bialtu Deputy Commissioner-te leh Superintendent of Police ten inter-state border (ramri hrul) ah remna leh muanna a awm reng theih nan thla tin virtual meeting neih rem tih a ni a, thla 6 dan ah dawhkan kil a thutkhawmna nei thin tur a rel a ni.

6. State pahnih a palaite hian ramri buaina chinfel kawng ah ramri hrul a chengte an pawimawh zia hria in an ni nen a tha taka thawhho a tul tih an pawm a, ramri kaihhnawih buaina leh harsatna a awm reng rengin ramri hrul a cheng mipuite leh a kaihhnawih zawng zawng ten anmahni thu a hma la nghal mai lovin thuneitute hnen ah thlen thin se tih a ni.

Joint Statement.pdf