No.7595/2020-2021

Vawiin chawhma dar 9:45 khan National Deworming Day pualin Gov't High School Lunglei ah hun hman a ni.  He hun hi Dr.Lalrinthangi SMO, Chief Medical Office Lunglei in kaihruai in National Deworming Day hi India ramah kumtin vawihnih hman thin a nih thu leh hemi pual hian kum 1 atanga kum 19 inkar te hnenah Rulhut hlo pek thin an nih thu a sawi.

He hun hmanpuitu leh khuallian ni bawk Pu M. Misael SDO (S) Lunglei chuan thu sawiin, hetiang hun hman a ni hi lawmawm a tih thu sawiin naupang hriselna hi sawrkar in a ngai pawimawh em em a, nakin lawk a kan ram tan mi tangkai tur leh ram hmasawnna thlen thei tu turte an la nih dawn avangin Sorkar in Programme tha tak tak a kal pui thu asawi a, Rulhut hlo pawh kum tin vawihnih a thlawnin sem thin anih thu a tarlang a. Rulhut pai chuan thisen tlakchham a awl a, thisen kan tlakchham chuan taksa a chaklo a, taksa a chakloh chuan rilru a hrisel lo a, chuvangin kan nih tur ang kan nihloh phah theih bakah zirlai tan phei chuan zirna kawngah harsatna a thlen thei a ti.

He hunah hian Dr.L.C Liana CMO Lunglei pawhin thu sawiin, rulhut in mihring taksa a pawi a khawih theih dan leh chumi laka fihlim tur chuan ei leh in tih thianghlim angaih thu sawiin, puitling tan pawh kumkhat ah vawihnih tal rulhut hlo ei thin a that thu sawiin, rulhut atanga natna hi Lei atanga kai thin a nih avangin Pheikhawk bun tam a pawimawh thu a sawi bawk.