No.7596/2020-2021

Vawiin khan DC Conference Hall, Mamit-ah Dr. Lalrozama, IAS, District Bawrhsap hovin National Deworming Day Launching Programme hman a ni.

NDD Launching Programme hmanpuitu Dr. Lalrozama chuan Rulhuthlo thawktute'n an sem tur chu kan District chhunga naupang zawng zawngin ei vek turin a chah a. Rulhut kan pai chuan naupang than a tha thei lova, kan chaw tha pai ang angte Rulhutin min eipui zel thin avangin nu leh pate pawhin ngaipawimawh a, an fate eitir ngei turin a chah a ni.

National Deworming Day hi Ni 22 atanga Ni 26 February, 2021 chhunga hman tur a ni a. Hemi hun chhung hian Kum 1 atanga Kum 19 inkar chu athlawnin khawtina ASHA Workers te'n Rulhuthlo an pe anga. Zirlai naupang, sikul kal mekte chu an zirtirtute'n an pek tura ruahman a ni. Rulhuthlo hi Kum 2 hnuailamin mum chanve a ei tur a ni a. Kum 2 chin chunglamin mum 1 a ei tur a ni.

NDD Launching Programme hmanna-ah hian Dr. Vanlalfela, CMO Mamit chuan Rulhut damdawi eia mitliam awm palh thin an sawi ang kha ni tawh lovin tuna Rulhuthlo an sem chhuah tur hian mihring taksaah nghawng tha lo lian tham a thlen dawn lova. Naupangte'n Rulhuthlo ei chu ngaipawimawh a, Rulhut an pai loh nan thil an ei dawn reng rengin an kutte fai taka sil thin turin a chah a ni.

He huna kalkhawmte hian Rulhut damdawi (Albendazole) an sem chu a huho-a eina hun an nei nghal bawk.