No.7597/2020-2021

Vawiin hian Government Serchhip High School tualah National Deworming Day, 2021 hawnna buatsaih a ni a. Serchhip bawrhsap Pu Kumar Abhishek, IAS chu khuallian a ni.

Pu Kumar Abhishek chuan, rulhut vangin naupangten thisen an tlachham thei a, eitur tha tlakchham vanga chaklohna ten a bawm thei a, an than chhoh zelnaah leh an rilru lam thlengin chaklohna an nei thei thin. Chuvang chuan rulhut hlote a hun taka eia, rulhut laka fihlim a tul tih a sawi a. Zirlai naupangte chu an hriselna vawngthaa thil thalo tinreng laka fihlim tum tlat turin a fuih a ni. Exam turin an inbuatsaih mek tih a hriatpui thu hrilhin tha taka an exam hmachhawn theuh turin duhsakna a hlan bawk.

He huna tel naupangte hian a rualin rulhut hlo an ei nghal a ni.

He hun hi Dr. Laldawngliana Sailo, CMO in a kaihruaia, Dr. Lalhlunpuii, SMO te, Pi Zohmangaihi, DEO te, Govt. Serchhip High School thawktute leh sawm bik midangte an tel a ni.

National Deworming Day, 2021 hi vawiin atanga dt 26th February, 2021 chhung hian kalpui tur a ni a. He hun chhungin khawtina ASHA Workers ten in tina lutin rulhuthlo damdawi ei thei tur chin, naupang kum 1 atanga kum 19 inkarte he damdawi hi an sem kual dawn a. A ei tur chinte hian ASHA Worker te hmuh lai ngeiin damdawi hi ei tur a ni ang.