No.7598/2020-2021

India sawrkarin hriselna kawnga rampum huapa a hmalakna pawimawh tak pakhat, Naupang Kum 1 leh Tleirawl kum 19 inkar te rulhut laka a thenfaina ni – National Deworming Day(NDD) chu vawiin khan hman a ni a. He Ni puala official launching programme chu Govt. KM Higher Secondary School, Dawrpui Vengtharah neih a ni a. He hun hi  Pi Esther Lal Ruatkimi, Commissioner & Secretary, School Education Department chu khuallian niin a hman pui a ni.

Pi Esther Lal Ruatkimi, Commissioner & Secretary, School Education Department chuan India sawrkarin hriselna kawngah nasa takin hma a la mek a. Heng hmalakna zingah hian Naupang Kum 1 leh Tleirawl kum 19 inkar te an lo hriselna zawk tur atan ahuhoa Rulhut Hlo(Albendazole)  eitir hi a ngai pawimawh em em a; he hun pawimawh tak hi February 2016 atangin kumtin la hman ziah a ni a ti. Kum dangah chuan NDD chu Sikul-ah leh Anganwadi Centre-ah te hman thin a ni a. Kuminah erawh chuan Hripui leng mek avanga Sikul tam tak khar a la nih avangin NDD hmanna Ni bikah hian tuna Sikul kal mek Pawl 10 leh Pawl 12 zirlai te chiah Rulhut hlo hi pek an ni ta a ni a ti. Kum 19 leh a aia naupang zawng zawng ten Rulhut hlo hi an ei vek theih nan kuminah chuan NDD hi ni khat chiah hmang lovin February 22 atanga February 26, 2021 thlengin kalpui a ni dawn a. Hemi hun chhung hian Rulhut hlo(Albendazole) hi kum 19 chin hnuai lam zawng zawngten in lamah an lo ei theuh theih nan ruahmanna siam a ni a ti. NDD chu Mizoramah tha taka kalpui a nih thin thu sawiin round hnuhnung ber August 2020 a neihah khan naupang kum 1-19 inkar 99.2% lain Albendazole chu an ei tih a sawi bawk a ni. 

NDD hi Mizoram district zawng zawngah a rual a hman a ni dawn a, Naupang leh tleirawl kum 1-19 tawh phawt chu a huam vek a. He hmalakna hi nu leh pa zawng zawng ten ngai pawimawh theuh turin Pi Esther Lal Ruatkimi, Commissioner & Secretary, School Education Department chuan a chah a. Rulhut avanga natna awm thin – thisen tlakchhamna leh than thu te umbo a nih theih nan nu leh pa te chu an fate faina kawng bakah thianghlimna leh hriselna kawngah te  zirtirna tha pe thin turin a chah bawk a ni.

Vawiina NDD launching programme hi Dr. Eric Zomawia, Mission Director, NHM chuan a kaihruai a. NDD chungchanga sawrkar hmalakna leh hriattur pawimawh te Dr.Lily Chhakchhuak hnen atangin ngaihthlak a ni. NDD a thawkho Department pa 5 te aiawh hnen atangin thusawi ngaihthlak a ni leh a. He hunah hian Zirlai thlan chhuah thenkhat te  Albendazole eitir an ni a. NDD hlawhtling taka kalpui a nih theihna kawngah hian School Education, Women & Child Development, Rural Development leh Public Health Engineering Department ten Health Department an thawhpui mek a ni.