1508/2026-2027

Lunglei, 2026 Vawkhniahzawn thla ni 24: Vawiin khan Lunglei District Level Co-ordination Committee for National Deworming Day chu Election Officer Pi Lalhruaitluangi hovin Lunglei DC Video Conference Hall-ah an ṭhu khawm a. National Deworming Day (NDD) Second Round 2026 kalpui dan tur an sawi ho.

He ṭhut khawmah hian Health & Family Welfare, Women & Child Development, School Education leh Information & Public Relations Department official-te, YMA Sub-Headquarters Lunglei leh MHIP Sub-Headquarters Lunglei ai awhte an tel a. Lunglei District Deputy Chief Medical Officer Dr Vanlalngheti chuan NDD First Round 2026 kalpui dan tar langin, Second Round atana ruahmanna awm sa leh thu ngaihtuah turte a sawi zau.

National Deworming Day hi kum tin vawi hnih – February thla leh August thlaah te hman ṭhin niin, kumin NDD Second Round hi August ni 10 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tura tih a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi zirna in leh anganwadi centre-ah te pek leh tura ruahman niin, chumia hmaihte chu an ina kal chilha pek leh turin ruahman a ni.

NDD Second Round 2026 bul ṭanna leh hawnna hun hi August ni 10, 2026 (Thawhṭanni) chawhma dar 11:00-ah Government Bazar High School, Lungleiah (Government Bazar Middle School nen inkawpin) hman tura ruahman a ni a. Hemi ni hian Lunglei District chhunga school, college leh anganwadi centre-ahte rulhut hlo inpek a nih dawn bakah, sikul kal lote chu ASHA-te'n an inah kal chilhin an pe ang a. Target zinga tel si, hemi nia pek hman lohte tan mop up day August ni 17-ah buatsaih a ni leh bawk ang.

NDD 2026 First Round (February)-ah khan Lunglei District chhunga rulhut hlo pek tur tinzawn (target) mi 44,898 aṭangin mi 44,535 (99%) chu rulhut hlo pek an ni a. Kumin NDD Second Round (August)-a rulhut hlo pek tur atan hian Lunglei District chhungah kum 1 leh kum 19 inkar mi 44,205 tinzawn an ni.