1507/2026-2027

Siaha the 24th July 2026: Labour Employment, Skill Development & Entrepreneurship (LESDE) Department, Siaha leh Government Saiha College (GSC) Siaha tangkawp biatsaihin vawiin khan GSC Seminar Hall, Siaha-ah ‘Job Fair 2026’ neih a ni a, Additional DC Pu Abraham Beirazi Khithie chuan Khuallian niin Job Fair hawnna a nei nghal.

Khuallian Pu Abraham Beirazi Khithie chuan Govt Saiha College chu Zirna in tha tawk tak leh changtlung tak, zirtirtute pawh thawkrim tak leh inpe zo tak an ni a, GSC atanga zirchhuak hlawhtling tak tak sawi tur an awm nual chu chhuanawm a tih thu a sawi. Chutih rualin hmasawnna tur tam tak a awm a, lehkha zirna lama tan lak bakah kawng engkimah hmasawn a tul tiin Siaha District leh Mizoram tan theihtawp chhuah turin zirlaite a chah.

Tunlai khawvelah hna a vang tawh em em a. Chutiang a nih laia hna ruaitu (job providers) ten an awm hmun ngeia an rawn kalchilh chu a vanneihthlak hle a, chutiang hun tha chu hmang tangkaia, ngaihtuahna fim tak nen hmalam hun atan hna tha tak an hmuh theihna tura inbuatsaih nan hmang turin a chah. Vawiina job providers kalkhawmte chu fakin midangte tan eizawnna bultumsaktu an ni a, malsawmna thlentu an ni tiin lawmthu a hrilh bawk.

He Job Fair hi Ministry of Labour & Employment (MoLE) hnuaia National Career Service project atanga buatsaih a ni a, Hna thawh tur nei (job providers) leh hna zawng mek (job seekers) te thlunzawmtu a ni.

Pu R Ramtinthanga, Asst Professor, GSC chuan he hun hi a kaihruai a, GSC Principal Prof Abdul Hannan Barbhuiya chuan welcome speech sawiin Pu Reuben T Kompa, Deputy Director LESDE Siaha hnen atangin report tawi ngaihthlak a ni bawk. Pi R Laltanpuii, Instructress, Govt ITI Siaha chuan lawmthu sawina a nei bawk a ni.

Job fair/ Career fair ah hian Company/Institution hrang hrang 15 ten stall an hawng a, zirlai leh thalai hna zawng mek thahnem takin an chhim a ni.