1506/2026-2027

Lawngtlai, 24th July 2026 : Vawiin khan Lawngtlai District Education Committee-  chuan an Chairman leh Bawrhsap nibawk Pu Donny Lalruatsanga hovin DC Conference Hall-ah an hmalakna hrang hrangte thlirletna an nei.

Pu Donny Lalruatsanga chuan kal khawmte hnena lawmthu sawina a nei hmasa a. Zirna hmasawnna turin  sawrkarin theihtawp a chhuah reng tih tarlangin, hemi kawngah hian thawhho thiam a pawimawh hle a ti a. Naupang thanglen zelna tur kawngah  'Elementary Education' tha a pawimawh hle tiin, zirna bulthut a nih angin chak zawka hmalak chhunzawm zel a tul hle a ti. Zirna kawnga District dangte entawntlak ni tura theihtawp chhuah tura District Education Committee- te chahin, Pu Donny Lalruatsanga chuan Lawngtlai District- mipuite pawh tha taka tawiawm thin turin a sawm nghal bawk.

Pu H. Laltanpuia , Addl. DPC Samgra, Lawngtlai chuan Lawngtlai District-chhunga Primary School atanga Higher Secondary School thlenga hmasawnna hnathawh hrang hrangte leh hmabak hnathawh turte tarlanna leh sawifiahna a nei a. Zawhna leh chhanna hunte hman nghal a ni.

Thutkhawmah hian thil pawimawh tak tak sawiho a ni a. PM POSHAN hnuaia Government leh Government-aided School-a zirlaite hnena chaw hrisel tak pek te, School attendance leh dropout tihhniam te leh Zirna tha zawk siam tura  chak zawka hmalak chhunzawm zel  ni se an ti a. A bik takin 'Nutritional Garden' changtluk zawk siam chu a pawimawh hle tih pawm tlangin School - tin ten tan an lak thar theih nan inzirtirna kalpui ni se tiin, 'Fruit Day' kalpui thinte pawh chhunzawm zel ni se an ti a. School zinga 'Nutritional Garden' neithate tan chawimawna lawmman siama, Republic Day - ah pek thin ni se an ti a ni.  Booth Level Officer (BLO) chungchang sawiho niin, Zirtirtute anmahni thawhna khua/ Veng ngeiah BLO an nih ngei theih nan hmalak ni se, hemi atan hian thuneitute hnenah ziaka thehluh ni se an ti a ni. Zirlai naupangte zingah 'Career Guidance' tam zawka nei tura hmalak ni se an ti bawk a ni. Zirna Inah 'Civil Works' tha leh mumal zawk kalpui ni se an ti a, hemi hnuaia Proposal awm ang angte District Election Commitee (DEC) - ah thlen ni se, DEC - in uluk takin lo thlifim thin se an ti a ni.

Vawiin thutkhawmah hian Lawngtlai District Education Committee Member - te an telkim tha hle a, Pu Donny Lalruatsanga chuan lawmthu sawiin hun a khar.