3956/2024-2025

Lunglei, 2025 Pawlkut thla ni 24: India rama hmeichhe naupangte chanvo humhalh a nih theih nana inzirtirna hun atana kum tin January ni 24-a hman ṭhin ni bik serh hran, 'National Girl Child Day' (NGCD) lawmna chu vawiin khan Lunglei DC Conference Hall-ah District Bawrhsap Pi Navneet Mann hovin hman a ni a. Hmeichhe naupang hlawhtling (local girl champion)-te chawimawina hun leh NGCD puala intihsiakna hrang hrang lawmman semna hun hman a ni bawk.

Bawrhsap Pi Navneet Mann chuan dan hnuaiah hmeichhiate leh mipate'n dikna, chanvo leh zahawmna intluk tlang an nei tih sawiin, hmeichhiate'n hmeichhia an nih avanga en hran leh hnuaichhiah an tawk ṭhin chu dan mitah leh mihring nihna zawnah thil dik lo tak a ni, a ti a. Zirna, thiamna, infiamna leh theihna hrang hrang hmanga hmeichhiate dinhmun chawi kan a nih theih nan ṭan la tlang turin kal khawmte chu a chah a. NGCD campaign kalpui chhunga Women & Child Development hma lakna fakin, local girl champion-te lawmpuina a hlan bakah, intihsiakna hrang hrang hlawhtlin nana tel zawng zawngte chungah lawm thu a sawi bawk.

He hun hi Lunglei District Additional Deputy Commissioner Pi Rochuangkimi Khenglawt chuan a kaihruai a. Lungleia damdawi in pathum - Christian Hospital Serkawn, Civil Hospital Lunglei leh John Williams Hospital te hnenah nau nei awmna pindan (maternity ward)-a hman tur nebulizer hlan a ni a. Infiamna huanga hmeichhe naupang hlawhtling, local girl champion-te chawimawina hun hman niin, thuziak leh pawisa fai ₹2000 ṭheuh hmeichhe panga hnenah hlan a ni a. NGCD puala lemchan tawi (reel) insiamsiak leh lem-thu (flyer) insiamsiak lawmman te sem a ni bawk a. Lunglei District Hub for Empowerment of Women (DHEW)-a District Mission Coordinator (DMC) Pi K. Lalrinawmi'n lawm thu sawiin hun a khar a ni.

Kumin NGCD thupuiah hian hma hun eng tak nei tura hmeichhiate chawi kan pawimawhna, "Empowering Women for a Bright Future" tih chu thlan a ni a. January ni 15 aṭangin ni sawm chhungin hmeichhiate chawi kanna atana hma lakna hrang hrang kalpui niin, January ni 17 khan CMO office nen ṭang tlangin Bethesda School, Lungleiah hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual hygiene) chungchang zirtirna buatsaih a ni a. January ni 22 khan Pukpui Govt. M/S-I aṭanga Pukpui AWC-I thlengin anganwadi naupang leh sikul naupangte nen hmeichhe naupang tana kawng zawh buatsaih a ni a. Thing phun leh social media kal tlanga inzirtirna te kalpui ni bawkin, vawiina Lungleia damdawi in pathuma hmeichhe nau piangte hnenah lawmpuina pawisa fai leh hmanrua (diaper leh wipe) pe tura ruahman a ni bawk.

Vawiina chawimawina leh lawmman dawngtute chu a hnuaia mite hi an ni:

Local girl champion chawimawina dawngtute: