4125/2025-2026

Lunglei, 2026 Pawlkut thla ni 23: Vawiin khan Lunglei Deputy Commissioner (Bawrhsap) office-a thawkte chuan DC Conference Hall-ah National Voters' Day 2026 pualin India ram mipui rorelna vawng nung zel tur leh inthlanna felfai, thianghlim, zalen leh muanawm a awm zel theih nana hma la tura intiamna (NVD pledge) an chham rual.

Lunglei District Additional Deputy Commissioner Pi Rochuangkimi Khenglawt chuan hun kaihruaiin, mipui rorelna rama inthlan pawimawhna leh khua leh tuite'n duhthlanna thiang tak nena inthlan hmachhawn a pawimawhzia a sawi a. Additional DC kaihhruai hian officer leh staff-te chuan NVD thutiam an chham rual nghal.

National Voters' Day hi kum 2011 aṭang khan hman ṭan niin, kum tin January ni 25-ah hman ṭhin a ni a. Kumin hi a ṭum 16-na niin, a ni tak hi Pathianni a nih avangin Mizoramah chuan vawiin khan NVD puala thutiam chham rualna hun buatsaih a ni a. India rama inthlan buatsaih tura Danpui hnuaia din, Election Commission of India (ECI) chu January 25, 1950, India Republic Day hma ni chiahah khan din niin, chu ECI din ni chu National Voters' Day atan hian hman a ni.