4126/2025-2026

Lunglei, 2026 Pawlkut thla ni 23: Tukin zing dar 9:30 khan C. Ṭhuamluaia Mual, Lungleiah January ni 26, 2026 (Thawhṭanni) zing dar 9:30 aṭanga Lungleia Republic Day 2026 lawmna hun hman tur atana inpuahchahna leh en lawkna hnuhnung (final rehearsal) buatsaih a ni.

He hunah hian District Bawrhsap Pi Navneet Mann leh Superintendent of Police Pu J. Lalmuankima te bakah, official hrang hrangte telin, Republic Day ceremonial parade-a lam tur sipai leh zirlaite an kal khawm a. Republic Day lawmna hun hman dan tur duan lawk sa anga hun hman chhin niin, tluang tak leh felfai taka hun hman a ni.

Ruahman lawk dan chuan, kumin Republic Day lawmna hi Lungleia C. Ṭhuamluaia Mualah January ni 26, 2026 (Thawhṭanni) zing dar 9:30-ah hman tur niin, District Bawrhsap (Deputy Commissioner) Pi Navneet Mann chu Khuallian a ni dawn a. Dar 9:20 a.m.-ah Lunglei SP-in C. Ṭhuamluaia Mual thleng hmasain, dar 9:28 a.m.-ah Khuallianin Mual a thleng ang a. Khuallian hian dar 9:30 a.m.-ah Hnam Puanzar pawt pharhin, Hnam Hla rimawi tumin a chhunzawm ang a. Dar 9:35 a.m.-ah Khuallianin lam turte endikin, hei hi dar 9:40 a.m. aṭangin lam urhsun (ceremonial parade)-in a chhunzawm ang a. Dar 10:05 a.m.-ah Khuallianin thu sawiin, lawmman hrang hrang a sem chhunzawm ang a. Hnam Hla rimawi tum hmanga hun khar niin, Muala Republic Day lawmna hun hman zawh, chawhma dar 11:30-ah DC Bangla tualah 'VIP At Home' thingpui ruai buatsaih a ni ang.

Lungleia Republic Day hman turah hian ceremonial parade-ah armed contingent 5, unarmed contingent 6, school contingent 9 leh pipe band 2, a zavaiin contingent 22 an awm dawn a. Lunglei District Republic Day Celebration Committee chuan Republic Day lawmnaah hian tel vek turin Lunglei District mipuite an sawm a ni.