4144/2023-2024

LUNGLEI; the 13th March, 2024: Vawiin chawhma dar 11:00 khan Convention Centre,Lunglei kawtah ni 3 chhung awh tur DAY-NULM( Deendayal Antyodaya Yojana-National Urban Livelihood Mission) Festival,2024 vawi 2-na tur chu UD&PA, Lunglei hnuaia Lunglei City Mission Management Unit ten an buatsaih a. DAY-NULM Festival, 2024 hawnna programme tawi hi Pi Ramdinliani IAS, Deputy Commissioner chuan khuallian niin a chhim a, ribbon chep chatin Festival hi a hawng nghal a ni. Pu C.Sawihlira,DUDO,UD&PA,Lunglei chuan Festival hawnna programme hi a kaihruai a ni.

Khuallian Pi Ramdinliani chuan nikum lama Festival buatsaih aia Stall leh Participants an tam chu lawmawm a tih thu sawiin, vairama rethei an tih ang em em chu Mizoramah awm chiahlo mah ila khawpuia awm te tan bik khawsak harsa zualte dawmkan nan Day- NULM Scheme hi siam a ni, a ti. Sawrkar laipui hian mirethei zawkte dinchhuahna tur Scheme hrang hrang a siam a, a hming kan hriatthiam lemloh avangin mi tam takin kan ngaihven lo thin a, chuvangin Sawrkar hian kan tan eng Scheme nge a siam a, engtinnge kan chhawr tangkai theih dan tur tih kan ngaihven peih a tul hle a ni, a ti. NULM Scheme hnuaiah hian Self Help Group kaltlangin mi harsa zawkte tan eizawnna kawng hrang hrangin tanpuina a awm tih D.C chuan sawiin, hetih lai hian Self Help Group tam ber hian an nihphung leh an theihna te hi an hre tawklo thin a. Self Help Group an nih tawh chuan Scheme pakhat atan bik chauh nilo Scheme zawng zawng an hmang tangkai thei a ni tiin, hemi chungchang hi department lama thawktute pawhin Self Help Group te an hrilhhriat tam a pawimawh hle a ni, a ti. Self Help Group te chuan an theihna leh an chakna te chu an la hmang tangkai tawk lo deuh nia a hriat thu D.C chuan sawi bawkin, mahni chauha ding mailo in Area level leh City level Self Help Group-ah an intelkhawm chuan tih theih tam zawk leh hmalakna lian zawk a awm zel a ni tih hriaa hmalam pan zel tum turin a chah hlawm a, Retailer hna te Banking Correspondent hna te leh hna tam tak Self Help Group tan thawh tur a awm tih hriat a pawimawh a, duhthlan tur an ngah hle tih hria se; a duh thu a sawi.

Khuallian chuan Mizote hi kut themthiam kan nia a, mawi leh nalh kan hre em em a, mi ramin an siamthiam ang chu kan siam ve thiam ve zel mai a ni.Amaherawh chu quality lamah hian kan hniam a, kan thilsiam te belhchian a dawl tawkloh avangin kan hralh theilo a, a tam tawkloh vanga hralh harsatna awm bawk mahse kan thilsiam te hian phailam leh ramdang atanga an siam te quality- ah kan phalo a, kan thilsiam tam ber hi keimahni tualchhunga a miten lei se tih hi kan duhtawk a, a man kan chhiar to em em a, a to chhan-ah thil dang man a to tiin kan inpuh kual zel thin.Kan thilsiam chu quality belhchian dawl leh mi hip thei tur, midang el pha tura kan siam chuan awmhmun atangin Market zau tak kan nei ve thei a ni tih hriain, Self Help Group member zawng zawngte pawhin tan la thar sela a duhthu leh Festival buatsaih chu mipuiten an ngaihhluta lian zawka leh ropui zawk, zing zawka Festival buatsaih a nih theih nan Self Help Group te chuan mawhphurhna lian tak an nei a, Festival buatsaih leh zel turah pawh miten kan thil siamchhuah te an hlut theihna atan thil man chhiar tawk thiam leh man tlawm zawka hralh zawh thuai thuai chu thil finthlak tak nia a hriat thu D.C chuan a sawi bawk a ni.

Nl. B.Vanlahriatpuii,CMM,UD&PA chuan DAY-NULM nihphung leh hmalakna hrang hrang te leh Festival buatsaih chhan te report a pe a. Report a tarlan dan in,DAY-NULM Festival hi DAY-NULM hnuaia Beneficiary te tan inphochhuahna hun tha leh mipui ten an lo hmelhriat zau leh zual theihna tur a duan leh buatsaih a ni.DAY-NULM ( Deendayal Antyodaya Yojana-National Urban Livelihood Mission) hi Ministry of housing and Urban Affairs hnuaia Sawrkar laipui Flagship programme pawimawh ber pakhat niin, khawpui chhunga mirethei te chawikanna hna thawh thin a ni. DAY-NULM hnuaiah hmalakna hi hlawm hrang hrang 5 a then a ni a, chungte chu:-

1) Social Mobilization and Institutional Development(SM&ID)
2) Employment through Skill Training & Placement(EST&P)
3) Self Employment Programme (SEP)
4) Support to Urban Street Vendors (SUSV)
5) Shelter for Urban Homeless(SUH)

Vawiin DAY-NULM Festival,2024-ah hian DAY-NULM hnuaia beneficiary hrang hrang ten Stall 47 hawngin, an product te chu lei theih turin an chhawpchhuak a ni. Heng Stall-ah hian Handicraft chi hrang hrang mawi tak tak leh tangkai tak tak tur te,Food processing items chi hrang hrang ei leh in chi te, baking products te, puan leh bag te leh thil dang chi hrang hrang an phochhuak a ni. Stall 47 hawn atang hian: 36- hi Self hel Group(SHG), 4-Street vendors,6-SEP Loan la tawh te leh 1 hi EST (Employment through Skill Training & Placement) Training tawh a ni.Naktuk atang hian Stall engemaw zah hawn belh leh tura beisei a ni bawk.

Pu Donny Lalruatsanga, CEO,Lunglei Municipal Council pawhin thu sawiin, kan rama SHG ten beisei anga hlawhtlinna an hmuh thin lohna chhan nia a hriat chu tarlangin,  kan  teirei peih lo, mahni tuina tak trade thlan leh a hlawk tur trade thlan kan thiam tawk thin lo a ni, a ti.