4143/2023-2024

Champhai, the 13th March, 2024: UD&PA Department Champhai hnuaia City Mission Management Unit (CMMU) buatsaih DAY-NULM Festival 2024, Exibition-cum-Sale, March ni 13 atanga 15, 2024 thleng awh tur chu vawiin chawhma dar 11:30 khan District Bawrhsap Pu James Lalrinchhana chuan khuallian niin CHANEM Complex, Champhaiah a hawng.

Khuallian District Bawrhsap Pu James Lalrinchhana chuan UD&PA Champhai hmalakna hnuaia khawpuia cheng mi harsa zawkte chawikan nana scheme pawimawh tak pakhat Deendayal Antyodaya Yojana - National Urban Livelihoods Mission (DAY-NULM) kaltlanga festival buatsaih a ni chu lawmawm a tih thu a sawi a. Khawpuia chengte khawsak a inchen vek loh thu leh khawpuiah pawh mirethei leh harsa tam tak an awm theih thu sawiin, harsa zawkte tanpuia dawmkan nana DAY-NULM scheme kaltlanga hmalaknate fakawm a ti a, mipuiah hmalaknate kan hrilhhriat tam deuh deuh a tul a ni, a ti. UD&PA Department kaltlanga scheme hrang hrang hmalakna chu khawtlang damna leh miharsa zawkte chawikanna a nih thu sawiin, DAY-NULM hnuaia hmalakna dang khawlaia inzawrh/inpho (street vending) chungchang chu uluk taka zirchian a nih thu leh inzawrh phalna hmun (vending zone) ni lova inzawrh khap a ni chu khawpui leh a chhunga chengte tana tha zawk a ni tih hriaa kalpui a nih thu a sawi a. Hmuh theih chinah hmasawnna awm mahse hmasawnna tur a la tam a, hemi kawngah hian kan zavaia tanrual a ngai hle a ni, a ti bawk.

District Bawrhsap chuan mipuite chu DAY-NULM hnuaia hmalakna leh hamthatna awmte ngaihvena chhawr tangkai tum tur leh a tul a nih chuan thuneitute pawh zawh hrehlo turin a chah a. DAY-NULM hnuaia Self Help Group engemawzat an inziaklut chu lawmawm tiin, thawhhona tha leh taimakna chhawmnung zel turin member tinte a chah a. SHG kutchhuak te'n mipui ngaihhlut a hlawh thin thu sawiin, hralhna kawngah harsatna a awm loh nan quality tha, mawi leh lei itawm ni tura cheibawl kawngah ngaihtuahna seng turin a fuih a. Hlawhtling taka kalpui a nih theih nana duhsakna hlanin DAY-NULM Festival, 2024, Exibition-cum-Sale chu a hawng a ni.

A hawnna pual inkhawm tawi I&PR Conference Hall, CHANEM building-a neih hi Dr. Manesia Khaimeichho, DUDO Champhai chuan kaihruaiin kalkhawmte lawmna thu a sawi a. DAY-NULM City Mission Manager Pi Baby Lalremtluangi hnen atangin DAY-NULM hnuaia hmalakna hrang hrangte ngaihthlak a ni a. Pi Lalbiaklawmi, Community Organizer-in lawmthu sawiin hun hman a khar a ni.

DAY-NULM Festival 2024, Exibition-cum-Sale, Champhaia buatsaihah hian Stall hrang hrang 30 siam niin, DAY-NULM hnuaia beneficiary-te'n an thil siam leh thiam thil dehchhuahte an pho chhuak a, dawr theih turin an siam bawk a. Heng bakah hian tlawhtu naupangte tan intihhlimnate siam a ni bawk.

Tun dinhmunah hian DAY-NULM Champhai hnuaiah Self Help Group 115, anmahni enkawltu Community Organizer 2 leh Urban Resourse Person 6 te awm mekin SHG te hi thla tin vawi 2 an tlawh thin a ni.