Reproductive Child Health, Lunglei District, Lunglei bultumin vawiin chawhma khan RNTCP Conference Hall, Lungleiah ni thum awh District Level Sensitization Meeting cum Community Based Maternal Death Review Training neih a ni a, Lunglei CMO Dr. VLMS Dawngliana’n a kaihruai a ni.

Dr. VLMS Dawngliana chuan nausen pianghlim thihna (Infant Mortality Rate) leh nu nau chunga thihna (maternal mortality rate) te hi mipui mimirin kan hriat a hun tawh a, ram changkang leh changkang lo tehna a nih rualin, mipui hriselna ngai pawimawh tura kan infinchhuah a ngai a ni, a ti a. Lunglei District-ah pawh IMR leh MMR a tlahniam sawt tiin, kan hmazawn theuh a hna kan thawhrah mipuiin an seng chho mek a, hei aia inpekna tha zawk nen a thawk zel turin a chah a ni. Thlasik lai hian nausen in natna hlauhawm tak tak vei an awlsam avangin, nausen ngaihthah lo tura kan in zirtir uar a tul in, tan kan lak a ngai a ni, a ti bawk.

Dr. Lalawmpuia Chhangte, SMO chuan presentation hmangin ‘Introduction to two types of Maternal Death Review – FBMDR & CBMDR’, ‘MDR Process ‘ leh ‘Committees at District Level’-ah te zirtirna a pe a. Nu nau chunga thihna a thlenna chhan chhui chhuah a, siam that ngai te hmu chhuak a, engtin nge a thlen tawh loh nan hma kan lak ang tih hi maternal death review tum chu a ni, a ti.

District Project Manager Pu Lalhmunsiama’n Lunglei District chhungah kum 4 kalta a nu nau chunga thi zat leh an thih chhan te a tarlang a. Nu nau chunga thihna hi kum 2013-14 ah mi pahnih, kum 2014-15 ah mi pakhat, kum 2015-16 ah mi pali leh kum 2016-17 September thla thleng khan mi pakhat a ni a. Nau dama piang nuai khat zela nu thihna chu kum 2013-14 atangin 74, 39, 120 leh 87 a ni. He hunah hian maternal death review, nu nau chunga thi te thih chhan sawihona neih nghal a ni.

Dr. Johny Tlau, DRCHO pawhin presentation hmangin ‘Data Analysis, Monitoring and Supervision’-ah zirtirna a pe bawk a ni.

He training ah hian Lunglei District-a Medical Officer, department hrang hrang leh tlawngaipawl aiawh te an tel a ni.