Vawiin khan Central YMA in AR Lammual a Joint cultural meet-cum-bio-resources festival a buatsaih tur behchhana Lammual sira Department hrang hrang Bio-Resources Stall chu Home Minister Pu R. Lalzirliana'n chhun dar 12 khan a hawng.

Pu R. Lalzirliana chuan kut hnathawktute, mahni kut kawih ngei a ei hmuh tum te thlai tharte pho chhuahna atan Bio-Resources Stall buatsaih a ni chu lawmawm a tih thu a sawi a. Mizoram in ei leh bar kawngah hmasawnna kan neih theih nan taimak a pawimawh thu sawiin, midang tanpuina tello in mahnu kut kawih ngei hmanga ei hmuh tum chu Kristian rama chengte tih tur a ni a ti a.

CYMA hmalakna chu fakawm a tih thu sawiin, Bio-Resources Stall an buatsaih chuan rah tha a chhuah ngei a beisei thu a sawi. Bio-Resources Stall ah hian Mizoram tharchhuah thlai leh thei te, Mizo kutchhuak puan, mau leh hruihnang atanga siam te, pangpar te, ramhmul damdawi te, hnang atanga siam te, bawnghnute atanga siamte leh thil dang dang phochhuah a ni.