2421/2026-2027

Lunglei, 2026 Mimkut Thla ni 29: Nasha Mukt Bharat Abhiyaan (NMBA) hnuaia ruihhlo do beihpui peng khat atan Lunglei District Superintendent of Police (SP) Pu Shivam Siddharth ruahmannain vawiin khan Lungleiah hlawhtling takin "Ni Khat Atan SP" (SP for a Day) hun buatsaih a ni.

He hunah hian Lunglei khawpui chhunga zirlai naupang panga – Reuben Lalchhanchhuaha, Class X, 2nd Bn MAP English Medium School, Luangmual; P. Lalsiamngheti, Class X, Government High School, Lunglei; Rochanhlui Ralte, Class XII, Government Higher Secondary School, Lunglei; Jonathan Marandi, Class XII, Baptist Higher Secondary School, Serkawn; leh Lalruatpuia, Class X, Baptist Higher Secondary School, Serkawn te chu police hna thawh dan a taka an hmelhriat theih nan leh mawhphurhna pawimawh la ngam tura fuih phurtu atan SP ṭhutthleng luahtir an ni.

Zing dar 10:15-ah Zirlai-SP-te hian SP pisa thlengin, SP Pu Shivam Siddharth leh police hotu dangte'n an lo dawngsawng a. Zirlaite hi SP ṭhutthlengah a mal mala ṭhuttir chhin ṭheuh niin, police hotute nen inkawm hona hun an hmang a. SP Office-a pindan hrang hrang leh Lunglei Police Station te tlawh kualin, dan ken kawh, hnu chhui, lirthei che vel enkawl leh kawng hrang hranga police hna thawh dante a takin a hmun ngeiah enpui an ni.

He hunah hian police officer-te'n traffic dan leh a kaihhnawih te, a tak leh internet kal tlanga pawi khawihna thleng ṭhin hrang hrang te, Nasha Mukt Bharat Abhiyaan leh ruihhlo dona kawnga hma lakna leh hriat tur pawimawh hrang hrangte an zirtir a. Zirlaite hian SP leh MJA member-te nen inkawm hona hun an hmang bawk a. Police-te'n NMBA ruihhlo dona thu an tiamna hun chu Zirlai-SP-te hian an kaihruai bawk.

Zirlaite hian AP Tlanga Incinerator-a ruihhlo man sa hal ralna hun pawh chhimin, ruihhlo dona leh dan leh thupek ken kawh kawnga police-te hna thawh dan chu a takin an hmelhriat bawk.

"SP for a Day" hi zirlaite'n police mawhphurhna leh an hna thawh dante a taka an hmelhriat theihna tur te, chumi kal tlanga ṭhalaite leh police inkara inlaichinna ṭha a awm theihna tur te, khua leh tui ṭha ni tur leh ruihhlo awm lohna khawtlang him leh nuam siam tura ṭhalaite cho phurtu atan te ruahman a ni a. SP Pu Shivam Siddharth chuan hlawhtling taka hun hman a ni leh zirlaite phur taka an tel chu lawmawm a tih thu sawiin, zirlaite chu an zirlaiah leh an ni tin nunah chhenfakawm leh entawn tlaka hun hmang zel turin a chah.