2113/2024-2025

2024 Mimkut thla ni 18: India Sawrkar Laipui Ministry of Finance-in vawiin chawhnua a tlangzarh tur, New Pension Scheme (NPS) Vatsalya Scheme pualin vawiin chawhma khan National Bank for Agriculture and Rural Development (NABARD) leh Lead Bank Office, Lunglei te buatsaihin Lunglei Venglaia Graceland English School-ah he ruahmanna chungchang zir hona, FIF Awareness Programme on NPS Vatsalya Scheme hun hman a ni.

He hun hi Lunglei Lead Bank Office-a Lead District Officer Pu R. Lalmalsawma chuan kaihruaiin, NABARD Lungleia District Development Manager Pi Chiinngaihkim Phiamphu chuan NPS Vatsalya Scheme chungchang a sawifiah a. NPS Vatsalya Scheme chu Sawrkar Laipui ruahmanna thar a nih thu sawiin, he scheme kal tlang hian kum 18 hnuai lam tan nu leh pate'n ₹ 1,000/-in account an hawnsak theih thu leh chu chu kum 18 an tlin huna hman chhunzawm theih nghal tura duan a nih thu a sawi a. NPS Vatsalya Scheme hnuaiah hian kum 3 account tihnun a nih chuan pawisa dah luh aṭanga 25% lak chhuah theih a nih tur thu leh account holder a thih chuan an nu leh pate'n an pawisa dahte an lak let theih tur thu a sawi bawk.

He FIF awareness programme-ah hian Graceland English School zirlaite leh zirtirtute an tel a. Zawhna leh chhanna hun hman a ni bawk.

NPS Vatsalya Scheme hi Union Finance Minister Pi Nirmala Sitharaman chuan vawiin tlai dar 3 khan a tlangzarh a ni.

Attachment

  • Loading attachment...