3361/2024-2025
2024 Pawltlak thla ni 4: Vawiin khan Nehru Yuva Kendra (NYK), Lunglei District leh KT College, Lunglei te ṭang kawp huaihawtin Saikuti Hall, Lungleiah ṭhalaite kutpui, "Yuva Utsav - Lunglei District Level Youth Festival" buatsaih a ni.
He hun hi Lunglei West bialtu MLA Pu T. Lalhlimpuia chuan Khuallian niin a hmanpui a. India ramin zalenna a hmuh aṭanga kum 75 a tlin lawmna kal chho zelah kum 100 a tlin hun (kum 2047) atana ram hruaitute hmathlir ṭha tak tihlawhtling turin hma lak chhoh mek a nih thu sawiin, chu hmathlir leh hma lakna a hlawhtlin nan chuan ṭhalaite'n mawh an phur lian hle a ni, a ti a. Ṭhalaite chu ram tan mahni theihna zawnah eng emaw tal tih tum ṭheuh tura chahin, ram tana mi ṭangkai ni tur chuan zirlaite tan chuan lehkha zir ṭhat a pawimawh thu leh zirlai ni tawh lo tan pawh mahni thiam thil hman ṭangkai leh theihna tipung zel tura inzir a pawimawh thu a sawi a. Mi theih ang thei ve lo tura inngaihna rilru paih bova ding chhuak tur te, mahni hnam ziarang, nunphung leh rohlute chhuang leh chawi lar a, vawng him zel tur te, mahni nihnaa chiang leh lan chhuahtir chunga inunauna leh inpumkhatna chhawm nung zel tur te leh chhungkua, kohhran, khawtlang leh ram tana mawhphurhna hlen chhuah zel tum tur te'n kal khawmte chu a chah a ni.
He hunah hian Lunglei Sub-Headquarters YMA Vice President Pu CMS Dawngliana chuan inlawmna thu sawiin, Mizoram Ṭhalai Kristian Pawl (MṬKP) Secretary Rev. F. Zorinkhuma chuan hunserh a hmang a. NYK State Director Pi Mercy Sellate chuan hun hman chhan sawi fiahin, ṭhalaite fuihna thu a sawi a. District Level Yuva Utsav Organising Committee Chairman, Lunglei Additional Deputy Commissioner Pu James Miahlung pawhin ṭhalai kal khawmte fuihna thu a sawi a. KT College zirtirtu Miss Saidingpuii Sailo chuan lawm thu sawiin hun a khar a ni.
Yuva Utsav-ah hian chawhnu lamah science mela te, thupui thlan sa hmanga thu insawi siakna, "declamation contest" leh hnam lam intihsiakna, "cultural fest - folk dance competition" te buatsaih a ni a. Zaithiam zai te ngaihthlak niin, sawrkar department hrang hrang, bank, self help group leh mimal sumdawngte chuan exhibition leh food stall hrang hrang an buatsaih a. Yuva Utsav puala ṭhalaite tana intihsiakna chi hrang hrang buatsaiha ti ṭhate hnenah lawmman sem a ni bawk.
He Yuva Utsav thupuiah hian "Panch Pran of Amrit Kaal: India @2047" tih chu thupui atan hman a ni a. Kum 2047-ah chuan India ram chu ram hmasawn leh intodelh nihtir te, sal tang rilru aṭanga chhuah zalen te, hnam ziarang leh hlutna chawi san te, inpumkhatna vawn nun leh khua leh tui ṭha leh mawhphurhna hlen zo siam te chu he hma lakna hian a tum a ni.
Declamation contest-ah hian V. Lalrochami, Pukpui chu pakhatna niin, pahnihna Lampsy Lalhmangaihsanga, Government Electric Veng High School leh pathumna Pc. Lalmalsawma, KT Higher Secondary School te an ni a. Lawmmanah hian thuziak (certificate) bakah, pakhatnain ₹ 5,000/-, pahnihnain ₹ 2,500/- leh pathumnain ₹ 1,500/- te dawngin, pakhatna hian state level declamation contest-ah Lunglei District ai a awh ang.
Folk dance competition-ah hian Rahsiveng Youth Club-II chu pakhatna niin, pahnihna Government Leitlangpui High School leh pathumna Rahsiveng Youth Club-I te an ni a. Lawmmanah hian thuziak (certificate) bakah, pakhatnain ₹ 7,000/-, pahnihnain ₹ 5,000/- leh pathumnain ₹ 3,000/- te an dawng bawk.
Yuva Utsav puala science mela buatsaihah hian JNV Pukpui Taitesena Group chu pakhatna an ni a. Young artist talent hunt - poetry writing competition-ah T. Lalremruati, Bazarveng chu pakhatna niin, painting competition-ah F. Lalnunpuia, Venghlun chu pakhatna a ni a, mobile photography competition-ah V. Lalendinga chu pakhatna a ni thung a. Pakhatna aṭanga pathumna thlengin lawmman certificate leh pawisa fai pek an ni bawk.
Attachment
- Loading attachment...
