3362/2024-2025

2024 Pawltlak thla ni 4: Vawiin khan Lunglei South bial chhunga Ṭhaizawl khua chuan Community Hall, Ṭhaizawlah an khaw kum 50-na (Golden Jubilee) lawmna khawtlang huapin an hmang a. Lunglei South bialtu MLA Pu Lalramliana Papuia chuan Khuallian niin he hun hi a hmanpui.

Pu Lalramliana Papuia chuan Ṭhaizawl khuain Pathian malsawmna leh hruaina changa Golden Jubilee an hmang thei chu a lawmpui thu sawiin, khaw mipuite jubilee chibai bukin duhsakna a hlan a. Kum 50 chhunga khawtlang hmasawnna hrang hrangah hruaitu hmasate hna thawh a hlu tak zet tih sawiin, rilru thianghlim tak pu a, ṭawngṭaina nena khawtlang hmasawnna tura ke pen zel turin khawtlang mipuite chu a chahin a sawm a ni.

Pu Lalramliana Papuia chuan bial tan leh ram tana hna a thawhna turah duhsak bik nei lova hna thawh a tum tih sawiin, bialtu MLA lo ni tawhte'n theih tawp an chhuahna avanga hmasawnna awmah lawm thu a sawi rualin, MLA lo ni tawhte'n theih tawp an chhuahnate ngaihlu thiam a, khawtlang leh ram hmasawn nana ṭan lak chhunzawm zel turin mipuite chu a chah a. Ram rawngbawlna kawngah leh hmasawnna kalpui turah mipuite'n rilru dik put a ṭul tih sawiin, mimal, chhungkua leh pawl bil hamṭhatna aiin khawtlang hmasawnna tur ngaih pawimawh thiam a ṭul thu a sawi. 

Ṭhaizawl khaw golden jubilee lawmnaah hian Khuallian, bialtu MLA Pu Lalramliana Papuia hi Lunglei Municipal Council (LMC) Vice Chairman Pu K. Lalrinawma bakah party hruaitute'n an ṭawiawm a. Golden jubilee lawmna inkhawm hi Pu HS Lalramdika'n kaihruaiin, Upa HS Zatawna, BCM Ṭhaizawl chuan hunserh a hmang a. Khuallian, bialtu MLA Pu Lalramliana Papuia chuan jubilee lungphun a hawng bawk. 

Ṭhaizawl khuain golden jubilee an lawmnaah hian jubilee dar vuak, jubilee hlado chham, jubilee booklet tlangzarh leh he khuaa awm hmasa berte hnena thilpek hlanna hun te buatsaih a ni a. Zaithiam zai leh special item te awmin, singing competion result puan leh lawmman semna hun hman a ni bawk a. Tlai lamah khawtlang huapa golden jubilee puala ruai buatsaih chu hlim taka kil ho a ni bawk. 

Ṭhaizawl khua hi December ni 3, 1974 khan din a ni a. Kum 1975 khan chhungkua cheng hmasa in 10 vel awmte chuan committee dinin, Pathian hnena an khua hlanna leh lawmna hun an hmang a. Kum 50 chhung hian he khua aṭang hian missionary mi pathum leh pastor pakhat, doctor leh nurse bakah sawrkar hna thawk eng emaw zat an chhuak tawh a ni.