2442/2026-2027

Lunglei, 2026 Mimkut Thla ni 30: Vawiin khan Lunglei District Disaster Management Authority (DDMA) huaihawtin Lunglei DC Conference Hall-ah Lunglei District chhunga sawrkar office hrang hrangte tana chhiatna thlen thulha chet lak dan tur ruahman lawkna, Office Disaster Management Plan (ODMP) siam dan zir hona buatsaih a ni.

He hunah hian office hrang hranga Disaster Focal Person-a ruatte leh office ai awhte an tel a. Lunglei DDMA Chairman, District Bawrhsap Pi Navneet Mann chuan training hi hawngin, chhiatna lo thlen thulha inven dan leh chet lak dan tur ruahman leh zir lawk chu thil ṭul tak a nih thu a sawi a. Sawrkar office hrang hrangte chu chhiatna thlen thulha thawktute leh anmahni dawrtute himna atan ruahmanna ṭha tak leh felfai tak nei ṭheuh turin a chah.

Lunglei Sub-Deputy Commissioner Pi Lalnunchhani Hnamte chuan hun kaihruaiin, inlawmna thu a sawi a. Disaster Management & Rehabilitation (DM&R) hnuaia Lunglei District Organiser Pi Chuaupari Pachuau chuan chhiatna thlen thulha chet lak dan tur leh hriat tur pawimawh hrang hrang te, Disaster Management Act 2005 hnuaia department-te'n ODMP an siam dan tur kaihhruaina te a zirtir a. Public Works Department (PWD), Lunglei Building Division-a Sub-Divisional Officer (SDO) Er R. Lalruatkima'n office building him leh ṭha zawka enkawl dan leh chhiatna thlen thulha tih tur leh tih loh tur hrang hrangte a zirtir bawk.

Training-a telte hi group-ah ṭhen hran niin, ODMP siamtir chhin an ni a. ODMP siam chhinte chu thlir ho leh sawi ho nghal a ni bawk.